యోగా ఇన్‌స్ట్రక్టర్‌ పోస్టులకు నోటిఫికేషన్‌ విడుదల

నవతెలంగాణ-హైదరాబాద్‌బ్యూరో
ప్రభుత్వ దవాఖాన్లలో 842 యోగా ఇన్‌స్ట్రక్టర్‌ పోస్టుల భర్తీకి ప్రభుత్వం శనివారం నోటిఫికేషన్‌ విడుదల చేసింది. దీనిలో 421 పోస్టులను పురుష అభ్యర్థులతో, మరో 421 పోస్టులను మహిళా అభ్యర్థులను భర్తీ చేస్తామని పేర్కొన్నారు. ఈ పోస్టులను కాంట్రాక్ట్‌ పద్ధతిలో భర్తీ చేస్తున్నట్టు నోటిఫి కేషన్‌లో తెలిపారు. పురుష యోగా ఇన్‌స్ట్రక్టర్లు నెలకు 32 యోగా తరగతులకు హాజరు కావాలని, మహిళా యోగా ఇన్‌స్ట్రక్టర్లు నెలకు 20 యోగా తరగతులకు హాజరు కావాలని పేర్కొన్నారు. గంటసేపు ఉండే ప్రతి తరగతికి రూ.250 చొప్పున రెమ్యునరేషన్‌ చెల్లిస్తారని తెలిపారు. అర్హత కలిగిన అభ్యర్థులు ఒరిజినల్‌ సర్టిఫికెట్లతో వాక్‌ ఇన్‌ ఇంటర్వ్యూలకు అటెండ్‌ కావాలని సూచించారు. ఉమ్మడి జిల్లా ఆయుష్‌ హెడ్‌ క్వార్టర్స్‌లో ఇంటర్వ్యూలు జరుగుతాయి. ఈ నెల 24న ఆదిలాబాద్‌, హైదరాబాద్‌, 25న నిజామాబాద్‌, 26న మెదక్‌, రంగారెడ్డి, 27న వరంగల్‌, నల్గొండ, 28న కరీంనగర్‌, 30వ తేదీ ఖమ్మం, మహబూబ్‌నగర్‌ జిల్లా హెడ్‌ క్వార్టర్‌ ఆస్పత్రుల్లో ఇంటర్వ్యూలు జరుగుతాయి. పూర్తి వివరాల కోసం ayush.telangana.gov.in వెబ్‌సైట్‌లో సంప్రదించాలని తెలిపారు.