– కొత్త ఓటర్ల నమోదుకు 13.06 లక్షల దరఖాస్తులు
నవతెలంగాణ బ్యూరో – హైదరాబాద్‌
ఈ సంవత్సరానికి చేపట్టిన ఓటర్ల జాబితా రెండో సవరణకు సంబంధించిన అభ్యర్థనలు, అభ్యంతరాల స్వీకరణ ఘట్టం మంగళవారం ముగిసింది. అర్హులైన పౌరులు కొత్త ఓటర్లుగా నమోదు చేసుకునే ప్రక్రియ(ఫారం-6), చనిపోయినవారు, చిరునామా మారిన వారి పేర్లను ఓటర్ల జాబితానుంచి తొలగించే ప్రక్రియ(ఫారం-7), ఓటర్ల జాబితాలోని వివరాల్లో సవరణలు చేసే ప్రక్రియ (ఫారం-8) కింద అభ్యర్థనలు, అభ్యంతరాలను స్వీకరిస్తున్నట్టు ప్రకటించిన తరువాత…ఈనెల 18 వరకు కొత్త ఓటర్ల నమోదుకు 13.06 లక్షల దరఖాస్తులు వచ్చాయని ప్రధాన ఎన్నికల అధికారి కార్యాలయం (సీఈవో) ఒక ప్రకటనలో తెలిపింది. పేర్ల తొలగింపునకు 6.26 లక్షల దరఖాస్తులు, వివరాల సవరణ కోసం 7.77 లక్షల దరఖాస్తులు అందాయని వివరించింది.
ఈ యేడాది జనవరి నుండి ఇప్పటివరకు 14.72 లక్షల మంది కొత్త ఓటర్లుగా నమోదు కాగా, 3.39 లక్షల మంది పేర్లను జాబితా నుంచి తొలగించారు. 10.95 లక్షల మంది ఓటర్లకు చెందిన వివరాల్లో మార్పులు చేశారు. ఈ మార్పులు చేర్పుల ఫలితంగా జాబితాలో మొత్తం 3.13 కోట్ల మంది ఓటర్లు ఉన్నట్టు, వీరిలో 1.57 కోట్ల మంది పురుషులు కాగా, 1.56 కోట్లమంది స్త్రీలు, 2,226 మంది ఇతరులు ఉన్నట్టు తేలింది. స్త్రీ పురుష నిష్పత్తి 994గా, ఓటరు, జనాభా నిష్పత్తి (2023 వరకు) 696గా తేలింది.
కొత్తగా చేరిన యువ ఓటర్లలో చెప్పుకోదగిన మార్పు కనపించిందని సీఈవో కార్యాలయం తన ప్రకటనలో వివరించింది. జనవరి 5, 2023 నాటికి 18-19 ఏండ్ల వయసున్న ఓటర్లు 2.79 లక్షలుండగా, 19 సెప్టెంబరు నాటికి వారి శాతం 6.51 లక్షలకు అంటే 234 శాతం పెరిగింది. రాష్ట్ర ఎన్నికల ప్రధాన అధికారి వికాస్‌ రాజ్‌ నిరంతర పర్యవేక్షణలో 33 జిల్లాల ఎన్నికల అధికారులు రాత్రింబవళ్లు చెమటోడ్చడం వల్లనే ఇది సాధ్యమమైందని ఆ ప్రకటనలో తెలిపారు. 18-19 ఏండ్ల మధ్య స్త్రీ పురుష ఓటర్ల నిష్పత్తి 717గా ఉండటం కొంత ఆందోళన కలిగించే విషయం. ఈ పరిస్థితిని మెరుగు పరచడానికి జిల్లా ఎన్నికల అధికారులు నిర్విరామంగా శ్రమిస్తున్నారు.
ఈనెల 19 వరకు అందిన దరఖాస్తులన్నింటినీ 27లోగా పరిష్కరించి, ఖరారైన తుది జాబితాను అక్టోబర్‌ నాలుగున ప్రకటిస్తారు. అభ్యర్ధనలు, అభ్యంతరాలకు గడువు ముగిసినప్పటికీ, అర్హులైన పౌరులు తమ దరఖాస్తులను ఎప్పుడైనా పంపుకోవచ్చనీ, ఎన్నికల జాబితా సవరించిన ప్రతిసారీ వాటిని పరిష్కరిస్తామని రాష్ట్ర జాయింట్‌ ప్రధాన ఎన్నికల అధికారి వివరించారు.
