మొదటిసారి తల్లిదండ్రులైన జంటకు ఎన్నో అనుమానాలుంటాయి. ముఖ్యంగా బిడ్డకు ఇచ్చే ఆహారం గురించి. ఎందుకంటే పిల్లలకు పోషకాహారం అందించడం చాలా అవసరం. అలా అందించలేనపుడు ఆ బాధ వర్ణనాతీతం. తమ సందేహాలు తీర్చుకునేందుకు తల్లిదండ్రులు ఎంతో ప్రయత్నిస్తారు. అలా తాను మొదటి సారి తల్లి అయినపుడు సోనాల్‌ భరద్వాజ్‌ కూడా తన సమస్యకు పరిష్కారం కోసం ఎంతో వెదికింది. చివరకు తన లాంటి తల్లులకు మార్గనిర్దేశం చేసేందుకు వైరా కేర్‌ను ప్రారంభించింది. అలా తల్లి పాలివ్వడం, ఎదిగే పిల్లలకు ఘనపదార్థాలను పరిచయం చేయడం, పిల్లల పోషకాహారం వంటి విషయాలపై తల్లిదండ్రులకు అవగాహన కల్పిస్తున్న ఆమె పరిచయం…
కోవిడ్‌-19 మహమ్మారి సమయంలో ఒత్తిడితో కూడిన జీవితంలోనే సోనాల్‌ 2020లో నెదర్లాండ్స్‌లో ఓ బిడ్డకు జన్మనిచ్చింది. అయితే జీవితంలో ఇంత కీలకమైన సమయంలో కరోనా వల్ల తల్లిదండ్రులు ఆమెతో ఉండలేకపోయారు. చాలా మంది కొత్త తల్లిదండ్రుల మాదిరిగానే ఆమెకు చాలా ప్రశ్నలు ఉన్నాయి. శిశువైద్యులు ఆమెకు ఎంతో మద్దతు ఇచ్చారు. చనుబాలివ్వడం గురించి తెలుసుకునేందుకు సంబంధిత నిపుణుల వద్దకు పంపారు. వారు ఆహారం ఇచ్చే విషయంలో ఆమెకు మార్గనిర్దేశం చేశారు. అక్కడ ఉన్నన్ని రోజులు శిశువు పెరుగుదల, అభివృద్ధిని పర్యవేక్షించడంలో సహాయం చేశారు.
అడ్డంకులు అధిగమించేందుకు
భారతదేశానికి తిరిగి వచ్చిన తర్వాత తన స్నేహితులు, కుటుంబం, సహచరుల సహకారంతో బిడ్డకు ఇచ్చే ఆహారం గురించి మరింత తెలుసుకోవచ్చని ఆమె భావించింది. కానీ ఆమెకు ఆశించినంత ఫలితం దక్కలేదు. స్నేహితులు కూడా ఆమె మాదిరిగానే గందరగోళానికి గురయ్యారు. శిశు పోషణ, ఆహారం అందించడం, తల్లి పోషకాహార అవసరాల గురించి వారికి కూడా ఎన్నో ప్రశ్నలు ఉన్నాయి. ఇదంతా గమనించిన సోనాల్‌ తనలాంటి కొత్త తల్లిదండ్రులకు తమ పిల్లల ఆరోగ్యం, పోషకాహారానికి సంబంధించిన అడ్డంకులను అధిగమించడానికి అవసరమైన సహకారం అందించాలనుకుంది. దీని కోసమే 2023లో వైరా కేర్‌ను ప్రారంభించింది. చండీగఢ్‌కు చెందిన ఈ ప్లాట్‌ఫారమ్‌ తల్లిపాలు, బాటిల్‌ ఫీడింగ్‌, శిశువులకు నిజమైన ఆహారాన్ని పరిచయం చేయడం, పోషకాహార నిర్వహణ వంటి సవాళ్లపై తల్లిదండ్రుల కోసం ఆన్‌లైన్‌ కోర్సులను అందిస్తుంది.
ధరలు ఇలా…
వైరా కేర్‌ పిల్లల పోషకాహారం గురించి రెండు ప్రోగ్రామ్‌లను అందిస్తుంది. అవి ఒకరితో ఒకరు సంప్రదింపులు, ప్రత్యక్ష కోర్సులు. ప్రోగ్రామ్‌ మూడు నెలలు ఉంటుంది. తల్లిదండ్రులు నిపుణులతో ఒకరితో ఒకరు సెషన్‌లను కలిగి ఉంటారు. తల్లిపాలు ఇవ్వడం, ఘనపదార్థాలను పరిచయం చేయడం, శిశువు పోషణపై మార్గదర్శకత్వం పొందుతారు. లైవ్‌ సెషన్‌ల తర్వాత పాఠాలు రికార్డ్‌ చేసి అందుబాటులో ఉంటాయి. ఇక్కడ తల్లిదండ్రులు నేరుగా నిపుణులతో సంభాషించవచ్చు. ప్రతి కోర్సు సాధారణంగా ఐదు మాడ్యూళ్లను కలిగి ఉంటుంది. వన్‌-ఆన్‌-వన్‌ ప్రోగ్రామ్‌ ధర రూ.15,000 నుండి రూ.18,000. అయితే లైవ్‌ కోర్సులు రూ. 3,500కి అందుబాటులో ఉన్నాయి. ఐదుగురు నిపుణుల బృందంతో వైరా కేర్‌ భారతదేశంతో పాటు యుఎస్‌లోని 500 కుటుంబాలకు పైగా సహాయం చేసింది. స్టార్టప్‌ జనవరి 2024లో ప్రీ-సీడ్‌ రౌండ్‌లో 1,00,000 డాలర్లు సేకరించింది. ఆసుపత్రులు, గైనకాలజిస్ట్‌లు, పిల్లల వైద్య నిపుణులతో కలిసి బి2బి సెగ్మెంట్‌ను ప్రారంభించాలని ఆమె యోచిస్తుంది. తద్వారా స్టార్టప్‌ మరింత మంది తల్లిదండ్రులను చేరుకోగలదు.
నిర్ణయం కఠినమైనదే…
మంచి జీతం వచ్చే కార్పొరేట్‌ ఉద్యోగాన్ని వదిలివేయడం సోనాల్‌కు అంత తేలికైన నిర్ణయం కాదు. అదనంగా చిన్న పిల్లవాడిని, స్టార్టప్‌ను నిర్వహించడం ఆమెకు మరొక సవాలు. ‘నా అభిరుచి కోసం స్థిరమైన ఉద్యోగంలోని సౌకర్యాలను వదులుకోవలసి వచ్చింది. నేను తీసుకున్న నిర్ణయం ఎంతో కఠినమైనది. సవాళ్లు ఉన్నప్పటికీ, నా వ్యవస్థాపక ప్రయాణం ఒక గొప్ప అభ్యాస అనుభవంగా ఉంది. నా భర్త కూడా ఎంతో మద్దతునిచ్చాడు. తరచుగా నాతో అర్థరాత్రులు పని చేస్తూ ఇవన్నీ సాధ్యమయ్యేలా చేశాడు’ అని ఆమె అంటుంది.
పోషకాహారం పిల్లల హక్కు
లింగ పరంగా వివక్షను ఏమైనా ఎదుర్కొన్నారా అంటే ‘నా విషయంలో స్త్రీగా ఉండటం సహాయపడుతుంది. నేనూ ఓ తల్లిని కాబట్టి ఇతర తల్లిదండ్రులతో మెరుగ్గా కనెక్ట్‌ అవ్వగలిగాను. ప్రతి తల్లీబిడ్డకు సాధ్యమైనంత ఉత్తమమైన ప్రారంభాన్ని అందించాలని మేము లక్ష్యంగా పెట్టుకున్నాం. ఎందుకంటే సరైన పోషకాహారం పిల్లల హక్కు’ అని ఆమె జతచేస్తోంది.
వైద్య రంగంలో అనుభవం…
‘ఆహారంతో ఆరోగ్యకరమైన సంబంధాన్ని పెంపొందించుకుంటూ వారి పిల్లలకు సరైన పోషణను అందించడంలో తల్లులకు మద్దతు ఇవ్వడం మా లక్ష్యం’ అని ఆమె పంచుకుంటుంది. బయోమెడికల్‌ ఇంజినీరింగ్‌లో బ్యాచిలర్‌ డిగ్రీ చేసిన సోనాల్‌ గతంలో ఫోర్టిస్‌, మాక్స్‌ ఆసుపత్రులతో కలిసి పనిచేసింది. అక్కడ ఆమె కృత్రిమ అవయవాలు, శరీర భాగాల మార్పిడి, రోగనిర్ధారణ యంత్రాలను అందిస్తూ వైద్యులకు సహాయం చేసింది. బయోమెడికల్‌ పరికరాలకు సాంకేతిక సహాయాన్ని కూడా అందించింది. 2013లో గ్రెనోబుల్‌ ఎకోల్‌ డి మేనేజ్‌మెంట్‌ ఫ్రాన్స్‌ నుండి అంతర్జాతీయ వ్యాపారంలో మాస్టర్స్‌ డిగ్రీ కూడా పూర్తి చేసింది. తర్వాత కార్పొరేట్‌ రంగానికి వెళ్లింరు. వైరా కేర్‌ను ప్రారంభించే ముందు లీడర్స్‌ బయోమెడికల్‌ అనే మెడికల్‌ పరికరాల కంపెనీలో ప్రొడక్ట్‌ మేనేజర్‌గా పనిచేసింది. అలాగే ఈమె సర్టిఫైడ్‌ శిశు, పీడియాట్రిక్‌ ఫీడింగ్‌ స్పెషలిస్ట్‌ కూడా. ‘హెల్త్‌కేర్‌ స్పేస్‌లో విస్తృతమైన అనుభవం నాకు మంచి నెట్‌వర్క్‌ను, ఫీల్డ్‌పై లోతైన అవగాహనను ఇచ్చింది’ అని ఆమె చెప్పింది.
