నెలలో టీహెచ్ఆర్ నగర్ కు బస్తీ దవాఖాన

పట్టణంలోని టీహెచ్ఆర్ నగర్ లోని ప్రజల కోసం నెల రోజులలో బస్తీ దవాఖాన ప్రారంభిస్తామని రాష్ట్ర ఆర్థిక, ఆరోగ్య శాఖ మంత్రి హరీశ్ రావు అన్నారు.  రేషన్ షాపు కావాలని ప్రాంత వాసుల కోరిక మేరకు వెంటనే ఏర్పాటు చేయిస్తానని మంత్రి భరోసా ఇచ్చారు. ఆషాడ మాసం పురస్కరించుకుని పట్టణ టీహెచ్ఆర్ నగర్ లోని శ్రీ ముత్యాల పోచమ్మ ఆలయంలో ఐదవ వార్షికోత్సవ వేడుకలు, బోనాల జాతర పండుగ సందర్భంగా మంత్రి  అమ్మవారిని దర్శించుకుని, ప్రత్యేక పూజలు నిర్వహించారు. ఈ సందర్భంగా ఆయన మాట్లాడుతూ.. కాలనీ వాసులకు ఆలయ ఐదవ వార్షికోత్సవం, బోనాల పండుగ జాతర పండుగ శుభాకాంక్షలు తెలిపారు. టీహెచ్ఆర్ నగర్ శరవేగంగా అభివృద్ధి చెందుతున్నదని, పెరుగుతున్న అవసరాలకు అనుగుణంగా ఈ ప్రాంతంలో రోడ్లు, మురికి కాల్వలకు దశల వారీగా నిధులు విడుదల చేయిస్తానని హామీనిచ్చారు. అమ్మదయతో ప్రజలంతా సుభిక్షంగా, సుఖసంతోషాలతో ఉండాలని ఆకాంక్షించారు. కార్యక్రమంలో  వార్డు కౌన్సిలర్ కొండం కవిత సంపత్ రెడ్డి,  ప్రజలు తదితరులు పాల్గొన్నారు.