గర్భసంస్కార్‌ పేరుతో సంఫ్‌ు అనుబంధ సంస్థ సమవర్ధిని న్యాస్‌ దిల్లీ జవహర్‌ లాల్‌ నెహ్రూ విశ్వవిద్యాలయంలో 5 మార్చి 2023న కార్యశాల నిర్వహించింది. 12 రాష్ట్రాల నుండి స్త్రీశిశువైద్యులు, ఆయుర్వేద వైద్యులు, యోగా గురువులు పాల్గొన్నారు. ”కడుపులోని పిండాలకు భారతీయ (హిందువాద) సాంస్కృతిక విలువలు నేర్పాలి. దీంతో దేశభక్తులైన, స్త్రీలను గౌరవించే పిల్లలు, రాముని వంటి కొడుకులు పుడతారు. గీత, సంస్కృతం చదివే గర్భశుద్ధి పద్ధతితో బిడ్డ డిఎన్‌ఎ. మారుతుంది” అని న్యాస్‌ నేతలు చెప్పారు. పౌరాణిక హిందు పాలకుల గుణగణాలు, నరేంద్ర మోడీ, డొనాల్డ్‌ ట్రంప్‌ల నాయకత్వ లక్షణాలు గల భావి నాయకులను తయారుచేయడం గర్భ సంస్కార్‌ లక్ష్యమని న్యాస్‌ జాతీయ నిర్వహణ కార్యదర్శి మాధురి మరాఠే అన్నారు. గర్భసంస్కార్‌ అన్న సంస్కృత పదాలకు గర్భసంచిని శుద్ధిచేయడం, పిండం మెదడును చైతన్య పరచడం అని అర్థం. ఇది వేదకాలపు ఆధ్యాత్మిక ఆచరణ. గర్భసంస్కార్‌లో గర్భవతులకు భగవద్గీత, రామాయణ శ్లోకాలను వినిపిస్తారు. యోగా నేర్పిస్తారు. సాంస్కృతిక విలువల పేరుతో మతాధిపత్య భావజాలాన్ని పుట్టబోయే పిల్లల, తల్లుల మెదళ్ళలో చొప్పించి, వారిని హిందువాదంతో చైతన్య పరిచే ప్రక్రియే గర్భసంస్కార్‌. గర్భసంస్కార్‌, చైతన్యవంతమైన సంస్కృతి, నాగరికతలతో శుద్ధ మతతాత్విక పవిత్ర శిశువులను పుట్టిస్తుందట. వినాయక్‌ దామోదర్‌ సావర్కర్‌, వీర శివాజీ ఈ గర్భసంస్కార్‌ తోనే పుట్టారట. ఆయుర్వేదంలో సుప్రజ జనన్‌ పేరుతో గర్భసంస్కార్‌ ప్రస్తావన ఉంది. సుప్రజ జనన్‌ ప్రకారం పిల్లలను కనాలనుకున్న దంపతులను మూడు నెల్ల ముందే శుద్ధీకరిస్తారు. గ్రహబలాల ప్రకారం భార్యాభర్తల సంభోగ సమయాన్ని నిర్ణయిస్తారు. పిండశుద్ధి అనగా భర్త వీర్యాన్ని, భార్య అండాన్ని శుద్ధిచేస్తారు. శుద్ధిప్రక్రియల వివరణ లేదు. దంపతులు శారీరకంగా ఆరోగ్యంగా ఉన్నా మానసికస్థిరత్వం, ప్రశాంతత (సత్వగుణం) లేకపోతే ఆరోగ్యమైన పిల్లలను కనలేరని తీర్మానిస్తారు. ఆహారం వంటి అనేక అంశాలపై సత్వగుణం ఆధారపడుతుంది. సాత్వికశా కాహారాన్నే తినమంటారు. ఆయుర్వేదవైద్యుల ఇష్టానుసారం సంతానవతుల ఎంపిక ఉంటుంది. ఆయుర్వేదం ప్రకారం గర్భసంస్కార్‌ పిండాల వ్యక్తిత్వం, గుణగణాలను పెంచుతుంది. సాత్వి కాహారం, యోగా, ధ్యానం, మంత్రో చ్ఛారణ, రాగాలు, శ్లోకాలు, కథలు వినడం ఈ కార్యక్రమంలో ప్రధానం. సామవేద మంత్రాలు శ్రేయస్కరమట. ఇంపైన సంగీతంతో ఒత్తిళ్ళు తగ్గి తల్లిలో ఆరోగ్యకర హార్మోన్లు ఊరతాయి. పిండంపై సత్ప్రభావం చూపుతాయి. కాని వైదికమంత్రాలకు విజ్ఞానవంతులైన పిల్లలకు లంకెపెట్టడం విడ్డూరం. పూర్వం ఆయుర్వేద వైద్యులు ప్రజలందరికీ చికిత్స చేసేవారు. వైద్యంచేస్తూ వారు అంటరానివారిని కూడా తాకి అదే చేతులతో ఇతరులనూ తాకుతారని, సమా జాన్ని మైలపరుస్తారని నాటి ఆధిపత్యవర్ణాలవారు ఆయుర్వేదాన్ని అడ్డుకున్నారు. అది అటకెక్కింది. లేకుంటే 3 వేల ఏండ్ల నాడే చరకుడు, శుశ్రుతుడు అభివృద్ధి చేసిన ఆయుర్వేదం నేడు ప్రపంచంలోనే మెరుగయిన వైద్య విధానంగా ఎదిగేది. తాము నాశనంచేసిన ఆయుర్వేదంలో భాగమైన గర్భసంస్కార్‌ను ఇపుడు సన్మార్గుల జన్మకు వాడతారట! గర్భశుద్ధి కోసం 15 సెప్టెంబర్‌ 1935న హిట్లర్‌ చేసిన నూరెంబర్గ్‌ చట్టాల ప్రకారం జర్మన్‌ రక్తాన్ని, జాతిగౌరవాన్ని కాపాడటానికి జర్మన్‌, యూదుల మధ్య పెళ్ళి, వివాహేతర సంబంధాలను నిషేధించారు. 45 ఏండ్ల లోపు జర్మన్‌ స్త్రీలు యూదుల వద్ద ఉద్యోగం చేయరాదు.అశుద్ధజాతులుగా నిర్ధారించి, జన్యులోపాల సాకుతో, 4 లక్షల మందికి గర్భనిరోధక టీకాలు వేశారు. వేలాది మందికి బలవంతంగా గర్భస్రావం చేయించారు. పిల్లలను యాక్షన్‌ టి4 కింద చంపారు. యూదు స్త్రీలను, పిల్లలను, వృద్ధులను సామూహిక హత్యచేశారు. సంఫ్‌ు ఆరోగ్య విభాగ అధినేత అశోక్‌ కుమార్‌ జర్మనీకి వెళ్ళిశుద్ధ ఆర్యజాతి సిద్ధాంతాన్ని అధ్యయనం చేశారు. బారత్‌లో అమలుకు పథకాలు రచించారు. ముస్లింల, క్రైస్తవుల పుణ్యభూమి భారత్‌ కాదని, కమ్యూనిస్టుల సిద్ధాంతం విదేశాలదని ఎగతాళిచేసే సంఫ్‌ు ఉత్తమ జాతి పిల్లలను పుట్టించటానికి జర్మనీ సూత్రాలను అమలు చేస్తోంది. సంఫ్‌ు అనుబంధ ఆరోగ్య భారతి, ఉత్తమ సంతతి కోసం బీజేపీ పాలిత గుజరాత్‌, మధ్యప్రదేశ్‌లలో 16ఏండ్ల క్రితమే గర్భ విజ్ఞాన సంస్కార్‌ పథకాన్ని ప్రారంభించింది. ”ఉత్తమ సంతతి ద్వారా బలమైన భారత్‌ మా లక్ష్యం. 450 సంస్కారశిశువులను పుట్టించాం. 2020 నాటికి ప్రతి రాష్ట్రంలో గర్భ విజ్ఞాన్‌ అనుసంధాన కేంద్రాలను స్థాపిస్తాం” అని ఈ పథక జాతీయ అనుసంధానకర్త డా||కరిష్మా మోహన్‌ దాస్‌ నార్వాణి 1917 మే లోనే చెప్పారు. జర్మనీలో శుద్ధ ఆర్యజాతిని నిర్మించిన హిట్లర్‌ ఈ విషయంలో మాకు ఆదర్శమని సంఫ్‌ు నాయకులు అన్నారు. తాము ఉత్తమ హిందు జాతి అని నిర్ణయించినవారిని తప్ప మిగిలిన వారి పట్ల హిట్లర్‌ చర్యలు తీసుకుంటారేమో!? గర్భసంస్కార్‌లో పౌరాణికకథలను వినిపిస్తారు. అవి: కడుపుతో ఉన్న భార్య సుభద్రకు అర్జునుడు పద్మవ్యూహం గురించి చెప్పాడు. గర్భంలోని అభిమన్యుడు విన్నాడు. వ్యూహంలోకి పోవడం రావడం తెలిసిన యోధుడు అజేయుడై సవాలుగా మారతాడని భావించిన శ్రీకృష్ణుడు, వ్యూహం నుండి బయటికి రావడం చెప్పకుండా అర్జునున్ని అడ్డుకున్నాడు. బయటికి రావడం తెలియని అభిమన్యుడు యుద్ధంలో దుర్మరణం పాలయ్యాడు. హిరణ్య కశిపుని భార్య లీలావతి కడుపులోని ప్రహ్లాదునికి నారదుడు విష్ణుకీర్తనలు వినిపించాడు. ప్రహ్లాదుడు విష్ణుభక్తు డయ్యాడు. నారదుడు నాస్తికులందరికీ కీర్తనలు ఎందుకు చెప్పలేదో! 8 శారీరక వంకరలతో పుట్టిన అష్టావక్రుని కథనూ ఆలపిస్తారట. ఈ కథ వింటే వంకరలేని పిల్లలెలా పుడతారు? హనుమంతున్నీ స్తుతిస్తారట. ఆంజనేయ స్తుతితో చిరంజీవులు పుడతారా? ప్రథమ దేవుళ్ళయినా పసిపిల్లలుగా మారితే దృశ్యజ్ఞానం ఉండదని సతీ అనసూయ కథలో కవి సరిగానే రాశారు. ఎన్నో పుక్కిటి పురాణాలను నమ్మిన సంఫ్‌ు దీన్ని ఎందుకు నమ్మదు? గర్భసంస్కార్‌ కార్యక్రమంలో గర్భం ధరించినప్పటి నుండి బిడ్డ పుట్టిన తర్వాత రెండేళ్ల వరకు తల్లీపిల్లలకు ‘చైతన్య’ శిక్షణ ఇస్తారు. 30వారాల పిండానికి ఇంద్రియాలు, మెదడు అభివృద్ధి చెందుతాయి. గర్భస్థపిండానికి వినికిడి శక్తే ఉండదు. పుట్టిన 3నెల్లకు అమ్మ వాసనను, సైగలను గుర్తిస్తుంది. మూడేండ్లకు గాని అతి ప్రాథమిక స్థాయి విషయాలు అర్థంకావు. ఆరేండ్లకు ఒక మోస్తరు పాఠాలు అర్థమవుతాయి. అడవిలో పెరిగిన పిల్లలకు మాటేరాదు. పిల్లకు, తల్లికి గర్భసంస్కార్‌లో చదివే సంస్కృత శ్లోకాలు అర్థంకావు. అయితే మతాచారాల లయబద్ద శబ్దాలు తల్లీపిల్లను సవ్వడి సమ్మతులుగా మారుస్తాయి. ఈ ప్రక్రియలో జరిగే హిందువాద తంతులతో తల్లి, రెండేండ్ల బిడ్డ మమేకమవుతారు. ఈ మిషతో తొలిగురువు, సమాజనిర్మాతఐన తల్లికి సంఫ్‌ు, కాషాయకషాయం తాపుతుంది. జన్యు సాంకేతికతలతో మాత్రమే శాస్త్రవేత్తలు జీవి డిఎన్‌ఎను మార్చగలరు. మాటలతో మనిషి డిఎన్‌ఎ మారదు. గర్భసంస్కార్‌తో భావి భారతం కాషాయమత్తులో మునుగుతుంది. ‘ఒక దేశం ఒక మతం’, శుద్ధ హైందవ జాతి సాఫల్యమవుతాయి. కార్యశాలకు హాజరైన వైద్యులెవరూ విజ్ఞానశాస్త్ర వాస్తవాలను మాట్లాడలేదు. ఏడాదికి వెయ్యి మంది గర్భవతులకు గర్భసంస్కార్‌ శిక్షణ ఇస్తామని ప్రమాణంచేశారు. యజమానులు ‘ఔనంటే ఔను కాదంటే కాదు’ అనే సౌజన్యపక్షపాత బాధితులు వీరు. గర్భసంస్కార్‌ కొత్త వ్యాపారాలకు తెరలేపింది. ప్రయోగశాలలు, శిక్షణాలయాలు, సాహిత్య సామగ్రి అమ్మకాలు విపరీతంగా పెరిగాయి.
– సంగిరెడ్డి హనుమంతరెడ్డి
సెల్‌:9490204545
