ఇలా శుభ్రం చేస్తున్నారా..?

ఇలా శుభ్రం చేస్తున్నారా..?సాధారణంగా ప్రతి ఇంట్లో దుస్తులు ఉతకడానికి, గిన్నెలు తోమడానికి రకరకాల సబ్బులు వాడుతుంటాం. వేటి కోసం అవే ప్రత్యేకమైన సబ్బులు మార్కెట్లో కూడా అందుబాటులో ఉంటాయి. అయితే సబ్బుతో అన్ని రకాల దుస్తులను ఉతకకూడదని నిపుణులు చెబుతున్నారు. అలాగే సబ్బుతో కొన్ని రకాల గిన్నెలు కూడా శుభ్రం చేయకూడదని అంటున్నారు. అవేంటో ఇప్పుడు చూద్దాం.
ఉన్ని దుప్పట్లు, దుస్తులు: ఉన్ని దుస్తులను సబ్బుతో శుభ్రం చేయకూడదంటున్నారు నిపుణులు. ఎందుకంటే వీటిని సబ్బుతో ఉతికితే అవి ముడుచుకుపోయి పాత వాటిలా కనిపిస్తాయి. ఇంకా వాటి లైఫ్‌ టైం కూడా తగ్గుతుందని అంటున్నారు. కొంతమంది బాగా శుభ్రపడతాయనే ఉద్దేశంతో ఉన్ని దుస్తులను గంటల తరబడి డిటర్జెంట్‌ పౌడర్‌లో నానబెడుతుంటారు. కానీ ఇలా చేయడం వల్ల ఉన్ని త్వరగా దెబ్బతింటుంది. కాబట్టి ఉన్ని దుస్తులను డిటర్జెంట్‌ పౌడర్‌ కలపని నీటిలో మాత్రమే పూర్తిగా మునిగేలా నాననివ్వాలి.
పట్టు చీరలు: పట్టుచీరలను ఎట్టిపరిస్థితుల్లోనూ సబ్బుతో ఉతకకూడదంటున్నారు. ఇలా చేస్తే వాటి రంగు, మన్నిక దెబ్బతింటుందని అంటున్నారు. వాటిని ఉతకడం కోసం ప్రత్యేకమైన లిక్విడ్‌లు మార్కెట్లో అందుబాటులో ఉంటాయని.. వాటిని ఉపయోగిస్తే మంచిదంటున్నారు. లేకపోతే వాటిని డ్రై వాష్‌కు ఇస్తే బెటర్‌ అని వివరిస్తున్నారు.
ఇనుప గిన్నెలు: ఈ మధ్యకాలంలో చాలా మంది క్యాస్ట్‌ ఐరన్‌ పాత్రల్ని ఉపయోగిస్తున్నారు. అయితే వీటిని సబ్బుతో శుభ్రం చేయకూడదు. దాని వల్ల ఆ గిన్నెలో ఉండే నాన్‌స్టిక్‌ ప్రాపర్టీస్‌ పోయి.. పదార్థాలన్నీ వాటికే అతుక్కుం టాయి. ఇంకా సబ్బుతో వాటిని శుభ్రం చేయడం వల్ల తుప్పు పట్టే ప్రమాదం కూడా ఉంది. కాబట్టి సబ్బుకు బదులుగా.. ఇతర పదార్థాలను ఉపయోగించి క్లీన్‌ చేయాలి. దీని కోసం.. ఒక పాత్రలో టేబుల్‌ స్పూన్‌ బేకింగ్‌ సోడా, నిమ్మరసం, కొన్ని వేడి నీళ్లు పోసి బాగా కలపాలి. తర్వాత మిశ్రమంలో స్క్రబ్బర్‌ ముంచి పాత్రలను బాగా రుద్దాలి. ఆపై నీటితో క్లీన్‌ చేస్తే సరి. ఐరన్‌ పాత్రలపై జిడ్డు, మరకలు పోయి తళతళా మెరుస్తాయి. ఎక్కువ కాలం పాటు మన్నికగా ఉంటాయి.
చాకులు: కూరగాయలు, పండ్లు కట్‌ చేయడం కోసం చాకు ఎంతగానో ఉపయోగపడుతుంది. అయితే దీన్ని సబ్బుతో శుభ్రం చేయడం వల్ల అంచు మందగించి, తుప్పు పట్టే అవకాశం ఉంది. కాబట్టి ఒక గిన్నెలో కొద్దిగా వెనిగర్‌, ఉప్పు వేసి కలపండి. చాకులను ఆ మిశ్రమంతో క్లీన్‌ చేసి నీటితో కడిగి క్లాత్‌తో తుడిస్తే సరిపోతుంది.
లెదర్‌ వస్తువులు : లెదర్‌తో చేసిన వస్తువులను కూడా సబ్బుతో శుభ్రం చేయకూడదు. వాటిని క్లీన్‌ చేయడానికి మార్కెట్లో ఎన్నో రకాల లిక్విడ్‌లు అందుబాటులో ఉన్నాయి. వాటితో క్లీన్‌ చేసుకోవాలి. లేకపోతే సోప్‌ నీళ్లలో ముంచిన క్లాత్‌తో శుభ్రం చేయమని నిపుణులు సలహా ఇస్తున్నారు.