మెడికల్‌ కాలేజీల ఫీజు దోపిడీని అరికట్టాలి : డీవైఎఫ్‌ఐ

నవతెలంగాణ బ్యూరో – హైదరాబాద్‌
రాష్ట్రంలో ప్రయివేట్‌ మెడికల్‌ కాలేజీల్లో వసూలు చేస్తున్న అదనపు ఫీజుల దోపిడీని అరికట్టాలని భారత ప్రజాతంత్ర యువజన సమాఖ్య (డీవైఎఫ్‌ఐ) రాష్ట్ర కమిటీ డిమాండ్‌ చేసింది. ఈ మేరకు ఆ సంఘం రాష్ట్ర అధ్యక్ష, కార్యదర్శులు కోట రమేష్‌, ఆనగంటి వెంకటేశ్‌ శుక్రవారం ఒక ప్రకటన విడుదల చేశారు. కాళోజీ ఆరోగ్య విశ్వవిద్యాలయ నిబంధనలకు విరుద్ధంగా ప్రయివేట్‌ మెడికల్‌ కాలేజీల యాజమాన్యాలు ఇష్టానుసారంగా ఫీజులు పెంచి విద్యార్థులపై భారం మోపడం సరైంది కాదని విమర్శించారు. బి కేటగిరిలో సీట్లు పొందిన విద్యార్థులను ప్రయివేట్‌ మెడికల్‌ కళాశాలల యాజమాన్యాలు రకరకాల కారణాల పేరుతో ఫీజులు కట్టాల్సిందేనంటూ విద్యార్థులను ఇబ్బందులకు గురి చేయడం తగదని హెచ్చరించారు. ఆ కాలేజీల్లో ప్రవేశం పొందిన యాజమాన్య కోటా విద్యార్థులను ప్రవేశాల సమయంలోనే రూ.12 లక్షల బ్యాంకు గ్యారంటీ ఇవ్వాలనీ, లేకుంటే చేర్చుకోమని చెప్పడం ద్వారా వందలాదిమంది విద్యార్థులు తీవ్రంగా నష్టపోతున్నారని ఆందోళన వ్యక్తం చేశారు. జీవోనెంబర్‌ 126, 127 ప్రకారం ప్రయివేట్‌ మెడికల్‌ కాలేజీల్లో అడ్మిషన్ల ప్రక్రియ ముగిసిన నెల రోజుల తర్వాత బ్యాంకు హామీని సమర్పించవచ్చని తెలిపారు. ఈలోపు విద్యార్థుల ప్రవేశాలను ఆపకూడదంటూ జీవోలో స్పష్టంగా ఉందని వివరించారు. ప్రభుత్వ ఉత్తర్వులను ఆ కళాశాలలు తప్పకుండా అమలు చేయాలంటూ కాళోజీ ఆరోగ్య విశ్వవిద్యాలయం ఆదేశాలున్నప్పటికీ ప్రయివేటు కాలేజీలు మాత్రం నిబంధనలకు విరుద్ధంగా బి కేటగిరీ సీట్లు పొందిన విద్యార్థులను ఫీజుల కోసం వేధిస్తున్నన్నాయని పేర్కొన్నారు. ఆ కాలేజీ యాజమాన్యాలపై చట్టపరమైన చర్యలు తీసుకోవాలని వారు ప్రభుత్వాన్ని డిమాండ్‌ చేశారు.