హరోం హర..ఫస్ట్‌ ట్రిగ్గర్‌ అదుర్స్‌

సుధీర్‌ బాబు హీరోగా నటిస్తున్న పాన్‌ ఇండియా చిత్రం ‘హరోం హర’. ‘సెహరి’ ఫేమ్‌ జ్ఞానసాగర్‌ ద్వారక దర్శకత్వంలో ఎస్‌ఎస్‌సి (శ్రీ సుబ్రహ్మణ్యేశ్వర సినిమాస్‌) బ్యానర్‌పై సుమంత్‌ జి నాయుడు నిర్మిస్తున్నారు. ‘ది రివోల్ట్‌’ అనేది సినిమా ట్యాగ్‌లైన్‌. నేడు (గురువారం) సుధీర్‌ బాబు పుట్టినరోజు. ఆయనకు అడ్వాన్స్‌ విషెస్‌ తెలియజేస్తూ మేకర్స్‌- ఫస్ట్‌ ట్రిగ్గర్‌ వీడియోను విడుదల చేశారు. రేడియోలో వాతావరణ రిపోర్ట్‌తో వీడియో ప్రారంభమవుతుంది. కొంతమంది వ్యక్తులు తమ చేతుల్లో ఆయుధాలతో వస్తారు. అతని ముఖం కనిపించనప్పటికీ సుధీర్‌బాబు కుర్చీలో కూర్చుని చేతిలో తుపాకీ పట్టుకుని కనిపిస్తారు. చివరగా అతని తుపాకీ నుండి ఫస్ట్‌ ట్రిగ్గర్‌ విడుదలౌతుంది. ‘అందరు పవర్‌ కోసం గన్‌ పట్టుకుంటారు… కానీ ఇది యాడాడో తిరిగి నన్ను పట్టుకుంది… ఇది నాకేమో సెప్తావుంది…’ అని సుధీర్‌ బాబు కుప్పం యాసలో అదరగొట్టడం విశేషం. మాండలికం, ఆయన వాయిస్‌ బేస్‌ పాత్రకు ఇంటెన్స్‌ తెచ్చింది. సుధీర్‌ బాబు ఈ సినిమా కోసం పూర్తిగా మేక్‌ ఓవర్‌ అయ్యారు. ఫస్ట్‌ ట్రిగ్గర్‌ యాక్షన్‌తో ఉండి, సినిమాపై ఆసక్తిని మరింత పెంచింది. ‘హరోం హర’ కథ 1989లో చిత్తూరు జిల్లా కుప్పంలో జరుగుతుంది. గ్లింప్స్‌ ద్వారా ఈ ఏడాది డిసెంబర్‌ 22న క్రిస్మస్‌ సెలవుల సందర్భంగా ఈ చిత్రాన్ని విడుదల చేస్తామని మేకర్స్‌ అనౌన్స్‌ చేశారు. అరవింద్‌ విశ్వనాథన్‌ సినిమాటోగ్రఫీ అందిస్తున్నారు. గ్లింప్స్‌లో విజువల్స్‌ అద్భుతంగా కనిపించాయి. చైతన్‌ భరద్వాజ్‌ బ్యాక్‌ గ్రౌండ్‌ స్కోర్‌ ఎలివేషన్స్‌ ఇచ్చింది. తెలుగు, తమిళం, కన్నడ, మలయాళం, హిందీ భాషల్లో ఈ సినిమా పాన్‌-ఇండియా విడుదల కానుంది. భిన్న కథ, కథనాలతో సాగే ఈ సినిమా, సుధీర్‌బాబు నటన ప్రేక్షకులను కచ్చితంగా మెస్మరైజ్‌ చేస్తాయనే దీమాతో మేకర్స్‌ ఉన్నారు. అలాగే సుధీర్‌బాబు కెరీర్‌లో గుర్తిండిపోయే సినిమాగా దీన్ని భావిస్తున్నారు. ఈ చిత్రానికి రచన, దర్శకత్వం – జ్ఞానసాగర్‌ ద్వారక, నిర్మాత – సుమంత్‌ జి నాయుడు, సంగీతం – చైతన్‌ భరద్వాజ్‌, డీవోపీ – అరవింద్‌ విశ్వనాథన్‌, ఎడిటర్‌ – రవితేజ గిరిజాల.