మనిషికి శారీరక ఆరోగ్యం ఎంత ముఖ్యమో మానసిక ఆరోగ్యం కూడా అంతే ముఖ్యం. ఆందోళన, ఒత్తిడి వంటివి సహజమే అయినప్పటికీ ఆనందంగా ఉన్నప్పుడు మాత్రమే వాటిని ఎదుర్కొనే శక్తి మనలో ఉంటుంది. నేషనల్‌ ఇన్‌స్టిట్యూట్‌ ఆఫ్‌ హెల్త్‌ నిపుణుల అధ్యయనం ప్రకారం ఇటీవల టీనేజర్లలో మానసిక ఆందోళన పెరుగుతోందని తేలింది. 13 నుండి 18 ఏండ్ల వయసు గల యువతీ యువకుల్లో దాదాపు మూడింట ఒక వంతు మంది యాంగ్జైటీ డిజార్డర్‌ను ఎదుర్కొంటున్నారు. ముఖ్యంగా అమ్మాయిలు ఈ సమస్యతో ఎక్కువగా బాధపడుతున్నారు. ఇది టీనేజర్ల భవిష్యత్‌పై తీవ్ర ప్రభావం చూపే అవకాశం ఉంది. కాబట్టి దానిని మేనేజ్‌ చేసుకునేందుకు నిపుణులు కొన్ని సూచనలు ఇస్తున్నారు. అవేంటో తెలుసుకుందాం…
కొన్ని సార్లు ఆయా పరిస్థితులను ఎలా ఎదుర్కోవాలో తెలియక, అవగాహన లేక టీనేజర్లలో ఆందోళన పెరుగుతుంది. అందుకోసం వాటిని తట్టుకోవడానికి అవసరమైన శక్తి కావాలి. కాబట్టి ఆందోళనను రేకెత్తించే కార్యక్రమాల్లో నిమగమవ్వడం ద్వారా క్రమంగా మిమ్మిల్ని మీరు సవాలు చేసుకోవాలని నిపుణులు చెబుతున్నారు. అలాగని ఒకేసారి మరీ ఎక్కువ ఛాలెంజింగ్‌ విషయాల జోలికి వెళ్లవద్దు. మీ కాన్ఫిడెంట్‌ను పెంపొందించు కోవడానికి సాధించగల గోల్స్‌ ఏర్పర్చుకోవడంలో మరింత క్లిష్టమైన పనులను అధిగ మించడంలో కాస్త ఎక్కువ శ్రమిం చండి. ఇలాంటి యాంగ్జైటీ ప్రేరేపిత పరిస్థితులకు స్థిరంగా, కుమిలి పోకుండా ఉండటం నేర్చుకోవడం ద్వారా కాలక్రమేణా ఆందోళనను అదుపులో ఉంచుకోవడం, ఎదుర్కోవడం సులభమవుతుంది.
నలుగురితో కలిసిపోవడం
మీకు ఖాళీ సమయం దొరికినప్పుడు సరదాగా గడిపే ప్రయత్నం చేయండి. అవసరమైతే నలుగురితో కలిసి గడపడానికి ప్రయత్నం చేయండి. దీంతోపాటు యోగా, డ్యాన్స్‌ వంటివి మీలోని ఆందోళనను తగ్గిస్తాయి. ఒంటరిగా లేదా స్నేహితులతో కలిసి వాకింగ్‌ చేయడం ఆందోళనకు విరుగుడుగా పని చేస్తుంది. వివిధ ఫిజికల్‌ యాక్టివిటీస్‌లో పాల్గొనడం వల్ల ఒత్తిళ్ల నుంచి మీ దృష్టిని మళ్లించవచ్చు. అల్లకల్లోలమైన భావోద్వేగాలను ఇది తగ్గిస్తుంది. తక్కువ శారీరక శ్రమతో పోలిస్తే టీనేజర్లలో అధిక స్థాయి శారీరక శ్రమ చేసే వారిలో యాంగ్జైటీ లక్షణాలు కలిగించే అవకాశం తక్కువగా ఉంటుందని పరిశోధనలు సూచిస్తున్నాయి.
చర్చించండి
మీ సమస్యలు లేదా ఆందోళనల గురించి అర్థం చేసుకుని, పరిష్కారం చూపగల నిపుణులు, స్నేహితులు, ఇతర వ్యక్తులతో మాట్లాడండి. తల్లిదండ్రులు మిమ్మల్ని ఇబ్బందికర పరిస్థితుల నుంచి తప్పించడంలో అందరికంటే బెటర్‌గా సహాయపడతారనేది కూడా గుర్తుంచుకోండి. అలాగే మీకు ఇష్టమైన వ్యక్తులతో మాట్లాడడం వల్ల ప్రతికూల భావోద్వేగాలను తగ్గించుకోవచ్చు. ఇది ఆందోళనను మేనేజ్‌ చేయడంలో సహాయపడుతుంది.
మీ గురించి మీరు తెలుసుకోండి
మీ బలాలు బలహీనతలు తెలుసుకోవడం ద్వారా మిమ్మల్ని మీరు సరిదిద్దుకోవచ్చు. దీనికోసం సెల్ఫ్‌ రిఫ్లెక్షన్స్‌లో పాల్గొనండి. బలహీనతలను అధిగమించడానికి, ఆత్మ విశ్వాసాన్ని పెంపొందించడానికి ఇది దోహదం చేస్తుంది. ప్రతి కూల అంశాలను స్పష్టంగా గుర్తించడం, నివారించడం అనేది స్వీయ-అభివృద్ధి కోసం అవసరమైన గోల్స్‌ సెట్‌ చేసుకోవడంలో అద్భుతంగా పని చేస్తుంది.
సమతుల్య జీవనశైలి
క్రమం తప్పకుండా ఫిజికల్‌ యాక్టివిటీ, తగినంత నిద్ర కలిగి ఉండటం, అలాగే విటమిన్లు, మినరల్స్‌తో కూడిన ఆహారం తీసుకోవడం, ఆరోగ్యకరమైన జీవనశైలి అలవర్చుకోవడం టీనేజర్లలోని ఆందోళనలను తగ్గిస్తాయి. మత్తుపదార్థాలు, పానీయాలకు దూరంగా ఉండండి. ఎందుకంటే ఇవి ఒత్తిడిని తట్టుకునే సామర్థ్యాన్ని దెబ్బతీస్తాయి.
సహాయం తీసుకోండి
ఆందోళన చెందుతున్నప్పుడు మీరు ఆ పరిస్థితి నుంచి బయట పడేందుకు ఇతరుల హెల్ప్‌ అడగడంలో తప్పులేదు. పరిస్థితులు విపరీతంగా మారుతున్నాయని మీరు భావిస్తే, మీ స్నేహితులను, నిపుణులను, కోలిగ్స్‌ను హెల్ప్‌ కోసం సంప్రదించవచ్చు. మన సమాజంలో మానసిక ఆరోగ్యంపై సరైన అవగాహన లేదు. దాంతో ఈ విషయంలో సహాయం అడగటం కూడాjక కొన్ని సార్లు అవమానంగా భావిస్తున్నారు. ఈ ఆలోచన తప్పు. టీనేజర్స్‌ ఆందోళనను ఎదుర్కోవడంలో ఇతరుల సపోర్టును తప్పక కోరవచ్చు. మెరుగైన భవిష్యత్తుకోసం ఆందోళనను ముందుగానే గుర్తించడం, పరిష్కరించుకోవడం చాలా ముఖ్యం. లేకపోతే ఇది మానసిక సమస్యలకు దారితీసే అవకాశం ఉంది.
ఆసక్తికలిగించే వాటిలో…
ఎప్పుడూ ఆందోళన కలిగించే విషయాలే ఆలోచించడం వల్ల ఇబ్బంది పడతారు. ముఖ్యంగా రాబోయే పరీ క్షలు, ప్రెజెంటేషన్‌లు లేదా ముఖ్యమైన సమావేశాలు వంటివి మీలో కాస్త ఆందోళన కలిగించేవిగా ఉండవచ్చు. ఈ పరిస్థితిని ఎదుర్కోవడానికి అంతకు ముందు మీకు ఆనందాన్ని ఇచ్చే, ఆసక్తికలిగించే కార్యక్రమాల్లో కూడా పాల్గొనండి. ఫ్రెండ్స్‌తో కలవడం, మీకు నచ్చే వీడియోలు, కామెడీ సిరీస్‌ చూడటం, ఇష్టమైన సంగీతం వినడం వంటివి చేయండి.
