– బీఆర్‌ఎస్‌ ఎమ్మెల్సీ కల్వకుంట్ల కవిత ట్వీట్‌
నవతెలంగాణ బ్యూరో-హైదరాబాద్‌
” తాను సీఎం కేసీఆర్‌ కుమార్తెగా గర్వపడుతున్నాననీ, తాము రాజకీయ వార సత్వాలను గౌరవిస్తాం”అని బీఆర్‌ఎస్‌ ఎమ్మెల్సీ కల్వకుంట్ల కవిత తేల్చిచెప్పారు. ఒక టీవీ ఛానల్‌ నిర్వహించిన సమ్మిట్‌లో తాను చేసిన ప్రసంగపు వీడియోను జతచేస్తూ ఈ మేరకు శుక్రవారం ట్వీట్‌ చేశారు. ”బీజేపీితో అంటకాగినప్పుడు పలు పార్టీల్లో వారసత్వ రాజకీయాలు కనిపించకపోవడం విడ్డూరంగా ఉంది. బీజేపీకి లొంగితేనే కుటుంబ పార్టీలు ఆ పార్టీకి ఆమోదయోగ్యమా” ? అని ప్రశ్నించారు. కేంద్రంలోని బీజేపీ ప్రభుత్వం దృష్టి మళ్లింపు రాజకీయాలు చేస్తుండటమే కాకుండా, ప్రజలు అడిగే ప్రశ్నలకు సమాధానం ఇవ్వదని, గత పదేండ్లలో మోడీ ప్రభుత్వం రూ. 100 లక్షల కోట్ల అప్పు తెచ్చిందనీ, ఇచ్చిన హామీలను అమలు చెయ్యకపోవడమే కాకుండా దక్షిణాది రాష్ట్రాలకు ప్రత్యేకంగా ఎటువంటి ప్రాజెక్టులు మంజూరు చేయడం లేదని తమిళనాడులో జరిగిన ఓ సదస్సులో ఆమె విమర్శించారు. బీజేపీి హిందుత్వ రాజకీయాలను సమర్ధవంతంగా ఎండగట్టారు. కవిత చేసిన ఈ వ్యాఖ్యలను సమర్థిస్తూ తమిళ ప్రజలు పెద్ద ఎత్తున ట్వీట్లు చేశారు. ఆమె చేసిన వ్యాఖ్యలను ప్రముఖ సినీ నటుడు ప్రకాష్‌ రాజ్‌ సమర్ధించారు. ట్విట్టర్‌ లో కవిత మాట్లాడిన వీడియోను షేర్‌ చేసిన ఆయన ”కవిత మంచి క్లాస్‌ తీసుకున్నారు” అంటూ స్పందించారు.
