పిల్లలు పుట్టిన తర్వాత మహిళల జీవితం ఇంటికే పరిమితమవుదుందనుకుంటారు కొందరు. కానీ ఈ తరానికి చెందిన మహిళలు మాత్రం ఇది కరెక్ట్‌ కాదని నిరూపిస్తున్నారు. పిల్లలు పుట్టిన కొద్ది రోజులకే తిరిగి పనిలోకి అడుగు పెడుతున్నారు. ఒక వేళ పిల్లల ఆలనా పాలనా చూడడం కుదరకపోతే కొంతకాలం కెరీక్‌కి గ్యాప్‌ ఇచ్చి తిరిగి ఉద్యోగ వేట ప్రారంభిస్తున్నారు. ఇలా తిరిగి కెరీర్‌ను ప్రారంభించే ముందు కొన్ని విషయాలు దృష్టిలో ఉంచుకుంటే మంచిదంటున్నారు నిపుణులు. అవేంటో తెలుసుకుందాం…
ఫలానా రంగంలో ఉద్యోగం తెచ్చుకోవాలి, ఉన్నత స్థాయికి ఎదగాలి… ఇలా కెరీర్‌ పరంగా ఒక్కొక్కరిదీ ఒక్కో దారి. అలాగని అందరూ ఇలా తమ తపనకు తగిన ఉద్యోగమే చేస్తారని చెప్పలేం. ముందు ఏదో ఒక ఉద్యోగం చేయాల్సిన పరిస్థితులు తలెత్తవచ్చు. కొంత ఉద్యోగ అనుభవం సంపాదించాక ఆ దిశగా ప్రయత్నాలు చేయొచ్చు కదా అనుకోవచ్చు. ఇలా పలు కారణాల వల్ల తమ అంతిమ లక్ష్యాన్ని వాయిదా వేస్తూ వచ్చిన వారికి సెకండ్‌ ఇన్నింగ్స్‌ సరైన సమయం అంటున్నారు నిపుణులు. ఎందుకంటే ఇంట్లో ఉంటూ పిల్లల బాధ్యతలు చూసుకున్నప్పటికీ రోజులో అప్పుడప్పుడూ ఎంతో కొంత సమయం దొరుకుతుంది. మీ తపనను నెరవేర్చుకోవడానికి ఆ సమయాన్ని కేటాయించుకోవచ్చు. కాబట్టి ముందు ఏదో ఒక ఉద్యోగంతో సరిపెట్టుకున్నా ఇప్పుడు మీ తపనేంటో తెలుసుకోండి. అంతిమ లక్ష్యం దిశగా అడుగువేయండి. ఇలా కొత్త విషయాలపై అవగాహన పెంచుకుంటూ, నైపుణ్యాల్ని మెరుగుపరచుకుంటూ, టెక్నాలజీ విషయంలో అప్‌డేట్‌గా ఉంటూ రెజ్యూమెను అప్‌డేట్‌ చేసుకోవడం ఎంతో అవసరం అంటున్నారు నిపుణులు.
ఆత్మన్యూనత వద్దు
కొంత మంది మహిళలు సుదీర్ఘ విరామం తర్వాత ఉద్యోగం చేయడానికి కాస్త జంకుతుంటారు. తిరిగి నిలదొక్కుకోగలమో లేదో అన్న భయం ఉంటుంది. వీటిని కూడా అధిగమించవచ్చు అంటున్నారు నిపుణులు. గతంలో చాలా ఇంటర్వ్యూలకు హాజరై ఉండి ఉంటారు. కానీ, ఇదే మీ మొదటి ఇంటర్య్వూ అనుకోండి. ఇందుకోసం మిమ్మల్ని మీరు కొత్తగా మార్చుకోండి. అవసరమైతే నిపుణుల సహాంతో శిక్షణ త్ణీసుకోండి. సీనియర్ల సలహాలు స్వీకరించండి. ఒక్క ఉద్యోగం కోసం వందలాది మంది రావొచ్చు. అంత మందిలో మీ ప్రత్యేకత తెలిసేదెలా? అందుకే ఉద్యోగ ప్రయత్నాల కంటే ముందే మీ నైపుణ్యాలను సరి చూసుకోండి. అప్పుడే ఏ మాత్రం భయం లేకుండా కొత్త ఉద్యోగానికి ప్రయత్నించొచ్చు.
ఆత్మవిశ్వాసం అవసరం
విరామం తర్వాత ఉద్యోగం కోసం ప్రయత్నించేటప్పుడు ఆందోళన సహజమే. అలాగని ప్రయత్నించకుండా భయపడటం అవసరం. మీ గత విజయాలను గుర్తు తెచ్చుకోండి. భవిష్యత్‌లో బిడ్డ ఆలనా పాలనా చూసుకుంటూనే ఉద్యోగం చేయాల్సి రావొచ్చు. అందుకే మీరేవిధంగా సన్నద్ధమయ్యారో, సమన్వయం చేసుకోగలరో కూడా చెప్పాల్సి రావొచ్చు. కాబట్టి వాటన్నింటికీ సూటిగా, స్పష్టంగా సమాధానాలు చెప్పగలిగితే వెనకడుగు వేయనక్కర్లేదు.
సమయం వృథా చేయొద్దు
రోజులు గడుస్తున్న కొద్దీ సమయం వృథా తప్ప మరే ప్రయోజనం ఉండదు. దీని వల్ల ఒక రకమైన అలసత్వం ఆవహించే అవకాశమూ లేకపోలేదు. కాబట్టి తిరిగి కెరీర్‌పై దృష్టి పెట్టే వారు ఎంత త్వరగా వీలైతే అంత త్వరగా ఉద్యోగ వేట ప్రారంభించాలంటున్నారు నిపుణులు. లేదంటే గ్యాప్‌ పెరిగిన కొద్దీ దాన్ని పూడ్చుకోవడం కష్టమవుతుందంటున్నారు. అవకాశాలూ సన్నగిల్లుతాయంటున్నారు. కనుక మీరు గతంలో పని చేసిన మీ సహౌద్యోగులతో నిరంతరం టచ్‌లో ఉండడం, లింక్డ్‌ఇన్‌లో నెట్‌వర్క్‌ పెంచుకోవడం మాత్రం మర్చిపోవద్దు. తద్వారా ఆయా కంపెనీల్లో ఉండే ఖాళీల వివరాలు వారు మీకు తెలియజేసే అవకాశం ఉంటుంది. తద్వారా ఉద్యోగ ప్రయత్నాలు మరింత సులభమవుతాయి. అంతటితో ఆగకుండా మీ వంతుగా మీరు ఆయా జాబ్‌ పోర్టర్స్‌లో మీ ప్రొఫైల్‌ను అప్‌డేట్‌ చేసుకుంటే వీలైనంత త్వరగా తిరిగి ఉద్యోగంలో చేరొచ్చు.
ఆచితూచి
కెరీర్‌లో గ్యాప్‌ తీసుకోవడం వరకు బాగానే ఉంటుంది. కానీ ఒక్కోసారి ఆ గ్యాప్‌ను పూడ్చడం అంత తేలిక కాకపోవచ్చు. అయితే అందుకు ఉద్యోగ ప్రయత్నాలు ప్రారంభించే ముందు నుంచే సన్నద్ధం కావాలంటున్నారు నిపుణులు. కాబట్టి మీరు కెరీర్‌ నుండి ఎందుకు విరామం తీసుకోవాల్సి వచ్చింది? ఇన్ని రోజులు సమయం వృథా చేశారా? ఏవైనా నైపుణ్యాలు నేర్చుకున్నారా? లేదంటే ఏదైనా బిజినెస్‌ చేశారా? వంటి వివరాలన్నీ ఇంటర్వ్యూ చేసే బృందానికి ఓర్పుగా నేర్పుగా వివరించాల్సి వుంటుంది. ఇలా చెప్పే క్రమంలో ఏమాత్రం తడబడినా ఎదుటివారికి సందేహం వచ్చే అవకాశం ఉంటుంది. కాబట్టి ఓ తల్లిగా పిల్లల ఆలనా పాలన చూసుకోవడానికే కెరీర్‌ నుంచి విరామం తీసుకోవాల్సి వస్తే నిస్సందేహంగా అదే విషయం చెప్పచ్చు. ఇక ఇప్పుడు ఉద్యోగానికి పూర్తి సన్నద్ధమయ్యానంటూ వారికి వివరిస్తే సరిపోతుంది. తద్వారా మీ పరిస్థితి వారు అర్థం చేసుకొని మీ అర్హతలు, మీ నైపుణ్యాల్ని బట్టి మీకు ఉద్యోగం కల్పించే అవకాశం కచ్చితంగా ఉంటుందంటున్నారు నిపుణులు.
కోర్సులు నేర్చుకోవచ్చు
అమ్మయ్యాక తిరిగి ఉద్యోగ వేట ప్రారంభించే తల్లులు కొత్త కోర్సులు నేర్చుకోవడమూ ముఖ్యమే అంటున్నారు నిపుణులు. కొత్తగా త్లైన వారికి అంత సమయం ఉండచ్చు… ఉండకపోవచ్చు. కానీ పిల్లలు పెరిగి పెద్దయ్యే కొద్దీ, స్కూలుకెళ్లే వయసు వచ్చిన తర్వాత రోజులో గంటో, రెండు గంటలో సమయం దొరక్కపోదు. ఆ సమయాన్ని కెరీర్‌ పరంగా సద్వినియోగం చేసుకోవడం మంచిది. ఇందులో భాగంగా మీరు నేర్చుకోవాలనుకున్న కోర్సులు, పెంచుకోవాలనుకున్న నైపుణ్యాలకు సంబంధించిన తరగతులు ఆన్‌లైన్‌లోనే బోలెడున్నాయి. వాటిలో కొన్ని ఉచితంగానైనా చేరచ్చు. లేదంటే కొంత ఫీజు చెల్లించి చేరచ్చు. ఇలా మొత్తానికి ఖాళీగా సమయం వృథా చేసుకోకుండా సద్వినియోగం చేసుకుంటే మీ ఉద్యోగ వేట మరింత సులభమవుతుందంటున్నారు నిపుణులు. అలాగే సెకండ్‌ ఇన్నింగ్స్‌ ప్రారంభించాలనుకునే మహిళలని ఇప్పుడు ఎన్నో సంస్థలు ప్రోత్సహిస్తున్నాయి. ఇలాంటి వారి కోసం ప్రత్యేకంగా కొన్ని వెబ్‌సైట్లు కూడా పని చేస్తున్నాయి. ఇలాంటి వాటి ద్వారా మీరు కోరుకున్న ఉద్యోగాన్ని సంపాదించవచ్చు.
