అక్టోబర్ 1న ‘కండిషన్స్ అప్లయ్’ పరిచయ సభ
పసునూరి రవీందర్ రచించిన ‘కండిషన్స్ అప్లయ్’ పుస్తక పరిచయ సభ జానుడి- సెంటర్ ఫర్ లిటరేచర్ అండ్ ఆర్ట్స్ ఆధ్వర్యంలో అక్టోబర్ 1న ఉదయం 10:00 గంటలకు ఒంగోలు డాక్టర్ మల్లవరపు రాజేశ్వరరావు భవన్లో నిర్వహించనున్నారు. ఈ సభలో ప్రముఖ సాహితీవేత్తలు కోయి కోటేశ్వరరావు, మల్లవరపు రాజేశ్వరరావు, పాటిబండ్ల ఆనందరావు, అనిల కుమారి, పి.రాజ్యలక్ష్మి, కత్తి కళ్యాణ్ పాల్గొని ప్రసంగిస్తారు.
– డా.నూకతోటి రవికుమార్
రచయిత జిల్లేళ్ళ బాలాజీకి ‘కె.ఎస్.విరుదు’ అనువాద పురస్కారం
కథా రచయిత, అనువాదకుడు జిల్లేళ్ళ బాలాజీకి అనువాదంలో ”కె.ఎస్.విరుదు” పురస్కారాన్ని తమిళనాడు కోయంబత్తూరులోని ”విజయ రీడర్స్ సర్కిల్” ప్రకటించింది. ఈ పురస్కారాన్ని అక్టోబరు 8న కోయంబత్తూరులో అందించనున్నారు.
ఎలనాగకు ‘ఉకియోటో’ అవార్డు
ఎలనాగ రచించిన ఆంగ్ల కవితా సంపుటి Dazzlers ను ఉకియోటో అనే అంతర్జాతీయ ప్రచురణ సంస్థ ప్రచురించి, టర్కిష్, ఫ్రెంచ్, జర్మన్, స్పానిష్ భాషలలోకి అనువదింపజేసింది. ఆ పుస్తకాన్ని రచించినందుకు ఆయనకు ”పొయెట్ ఆఫ్ ది ఇయర్ – 2023” అవార్డును ప్రకటించింది. వచ్చే ఏడాది జనవరి 12, 13, 14 తేదీలలో కలకత్తాలో నిర్వహించబోయే సాహిత్య సమారోహం(Kolkata Literary Carnival) లో ప్రదానం చేయనున్నట్టు ఓ ప్రకటనలో పేర్కొన్నారు.
సింహప్రసాద్ సాహిత్య సమితి శ్రీశ్రీ స్మారక కథల పోటీ ఫలితాలు
మహాకవి శ్రీశ్రీకి నివాళిగా సింహప్రసాద్ సాహిత్య సమితి ఆధ్వర్యంలో నిర్వహించిన కథల పోటీ ఫలితాలు వెల్లడించారు. బహుమతి పొందిన కథలు, రచయితలు.. చివరిచూపు కోసం – వెంకట శివకుమార్ కాకు (హైదరాబాద్), అగ్గిపుల్ల – భాస్కరాచారి కశివొజ్జల (వరంగల్), రెండు అగ్గిపుల్లలు చెప్పిన కథ – మల్లారెడ్డి మురళీమోహన్ (విశాఖపట్నం). అక్టోబర్ 14న హైదరాబాద్లోని రవీంద్ర భారతిలో నిర్వహించే సభలో బహుమ తులు అందజేస్తారు. వివరాలకు 9849061668 నందు సంప్రదించవచ్చు.
28న ఆచార్య కొలకలూరి ఇనాక్కు ‘మన కాలపు జాషువా’ పురస్కారం
ఈ నెల 28న మహాకవి జాషువా జయంతి సందర్భంగా పద్మశ్రీ ఆచార్య కొలకలూరి ఇనాక్కు ‘మన కాలపు జాషువా’ పురస్కారాన్ని ప్రదానం చేయనున్నట్లు జాషువా సాహిత్య వేదిక అధ్యక్ష, కార్యదర్శులు మువ్వా శ్రీనివాసరావు, పగిడిపల్లి వెంకటేశ్వర్లు ఓ ప్రకటనలో పేర్కొన్నారు. ఖమ్మం జెడ్పీ సమావేశ మందిరంలో నిర్వహించే ఈ కార్యక్రమానికి ముఖ్య అతిథిగా మందకృష్ణ మాదిగ, గౌరవ అతిధులుగా జి.లక్ష్మినర్సయ్య, ఆచార్య సి.ఖాసీం హాజరు కానున్నట్లు వారు వెల్లడించారు.