ఉల్లి ఆరోగ్యానికి చేసే మేలు ఇంతా అంతా కాదు. అందుకే ఉల్లి చేసే మేలు తల్లి కూడా చేయదంటారు. కోస్తే కన్నీళ్లు పెట్టించినా.. దానితో చేసే వంటలు అమోఘం. చద్దన్నంలో ఉల్లి పడితే చలువ చేస్తుంది… దోసెల్లోకి పచ్చడి చేస్తే కళ్లకు అద్దుకుని తినాల్సిందే! అంతెందుకు ఉత్తి ఉల్లిపులుసు పెట్టినా లొట్టలేయాల్సిందే. అంతే కాదు కొన్ని రోగాలను సైతం ఉల్లి అరికట్టగలదు. అటువంటి ఉల్లి వంటల గురించి తెలుసుకుందామా…
ఆరోగ్య ప్రయోజనాలు
ఉల్లిలో ఉండే విటమిన్‌-సి రోగనిరోధక శక్తిని పెంచుతుంది. చర్మ ఆరోగ్యానికి ఉపయోగపడే కొల్లాజన్‌ ఉత్పత్తికి తోడ్పడుతుంది. పచ్చి ఉల్లిపాయ చెడు కొవ్వును తగ్గించి గుండె ఆరోగ్యాన్ని కాపాడుతుంది. దీంట్లో ఉండే క్రోమియం రక్తంలో చక్కెర స్థాయులను నియంత్రిస్తుంది. ఉల్లిగడ్డలో ఉండే ఫోలేట్‌ నిద్రపట్టేలా, ఆకలి వేసేలా చేస్తుంది. కుంగుబాటు తగ్గడానికీ తోడ్పడుతుంది. పచ్చి ఉల్లి నమలడం వల్ల నోటి దుర్వాసనను అరికట్టవచ్చు. దంతక్షయాన్నీ నివారించవచ్చు.
మసాలా కూర
కావాల్సినవి: ఉల్లిగడ్డ- ఆరు, ధనియాల పొడి- టీస్పూన్‌, జీలకర్ర పొడి- టీస్పూన్‌, ఉప్పు- తగినంత, కారం- సరిపడా, నువ్వులు, పల్లీల పేస్ట్‌- కప్పు, అల్లంవెల్లుల్లి పేస్ట్‌- టీస్పూన్‌, తరిగిన పచ్చిమిర్చి- మూడు, చింతపండు గుజ్జు- రెండు టేబుల్‌స్పూన్లు, ఆవాలు- టీస్పూన్‌, జీలకర్ర- టీస్పూన్‌, ఎండుమిర్చి- రెండు, పసుపు- చిటికెడు, కరివేపాకు- కొద్దిగా, కొత్తిమీర తురుము- కొద్దిగా, నూనె- మూడు టేబుల్‌ స్పూన్లు.
తయారీ విధానం: నువ్వులు, పల్లీలను వేయించి పొడి చేసుకోవాలి. స్టవ్‌ వెలిగించి కడాయిలో నూనె పోసి వేడిచేయాలి. ఆవాలు, జీలకర్ర, ఎండుమిర్చి, పచ్చిమిర్చి, కరివేపాకు వేసి వేయించాలి. తర్వాత పసుపు, కారం, అల్లంవెల్లులి, కొంచెం ఉప్పు కలిపి పచ్చివాసన పోయేంతవరకు వేయించాలి. ఇప్పుడు మిక్సీ పట్టిన నువ్వులు, పల్లీల మిశ్రమం, జీలకర్ర, ధనియాల పొడి, సరిపడా ఉప్పు, చింతపండు గుజ్జు వేసి కొన్ని నీళ్లు పోసి అన్నీ కలిసేట్టుగా బాగా కలపాలి. తర్వాత ఉల్లిగడ్డ, ధనియాలు, జీలకర్రపొడి వేయాలి. తగినన్ని నీళ్లు పోసి మూతపెట్టి పదిహేను నిమిషాలపాటు తక్కువ మంట మీద ఉడకనివ్వాలి. దించిన తర్వాత కొత్తిమీర తురుము వేసుకోవాలి. ఈ కూర అన్నం, చపాతీల్లోకి ఎంతో బాగుంటుంది.
ఉల్లిపొరక ఉక్కిరి
కావాల్సినవి: ఉల్లిపొరకలు- రెండు కట్టలు, నూనె- రెండు టేబుల్‌ స్పూన్లు, జీలకర్ర- అర టీస్పూన్‌, ఉల్లిగడ్డ- ఒకటి, పచ్చిమిర్చి- ఆరు, పసుపు- అర టీస్పూన్‌, అల్లంవెల్లుల్లి పేస్ట్‌- అర టీస్పూన్‌, ఉప్పు- తగినంత, కొత్తిమీర తురుము- టేబుల్‌ స్పూన్‌.
తయారీ విధానం: ఉల్లిపొరకలు, ఉల్లిగడ్డ, పచ్చిమిర్చిని చిన్నముక్కలుగా తరగాలి. కడాయిలో నూనె పోసి వేడిచేసి జీలకర్ర వేసి, అది చిటపటలాడాక ఉల్లిగడ్డ, పచ్చిమిర్చి ముక్కలు వేయాలి. ఇందులో పసుపు, అల్లంవెల్లుల్లి పేస్టు వేసి పచ్చివాసన పోయేంతవరకు వేయించాలి. తర్వాత ఉల్లిపొరకలు, ఉప్పు వేసి మూతపెట్టి పది నిమిషాలు మగ్గనివ్వాలి. ఉల్లిలో నీరు ఉంటుంది కాబట్టి ప్రత్యేకంగా నీళ్లు పోయాల్సిన పని లేదు. నీరంతా ఇంకిపోయి కూర దగ్గరకు వచ్చిన తర్వాత దించి కొత్తిమీర చల్లుకోవాలి. ఇష్టమైతే కొంచెం కారం కూడా వేసుకోవచ్చు.
పచ్చడి
కావాల్సినవి: ఉల్లిగడ్డ – రెండు, ఎండుమిర్చి- ఇరవై, చింతపండు- పెద్ద నిమ్మకాయంత, ధనియాలు- మూడు టీస్పూన్లు, మెంతులు- అర టీస్పూన్‌, వెల్లుల్లి రెబ్బలు- పది, ఆవాలు- అర టీస్పూన్‌, మినప్పప్పు- టీస్పూన్‌, పసుపు- పావు టీస్పూన్‌, ఇంగువ- చిటికెడు, ఉప్పు- తగినంత, నూనె- మూడు టేబుల్‌స్పూన్లు, కరివేపాకు రెబ్బ- ఒకటి, కొత్తిమీర- కొద్దిగా.
తయారీ విధానం: స్టవ్‌ వెలిగించి కడాయిలో కొద్దిగా నూనె పోసి వేడిచేయాలి. ఎండుమిర్చి, మెంతులు, ధనియాలు వేసి తక్కువ మంట మీద దోరగా వేయించాలి. వీటిని పక్కకు తీసి చల్లారబెట్టుకోవాలి. అదే కడాయిలో కొద్దిగా నూనె పోసి వేడెక్కాక ఉల్లిగడ్డ ముక్కలు వేయాలి. చిటికెడు ఉప్పు వేస్తే ఉల్లిగడ్డల్లోని నీరు బయటకు వచ్చి త్వరగా వేగుతాయి. ఇప్పుడు నానబెట్టిన చింతపండును నీటితోపాటుగా వేసి ఉడకనివ్వాలి. వేయించిన ఎండుమిర్చిని మిక్సీ పట్టి పొడిచేసి పెట్టుకోవాలి. ఉల్లిగడ్డలు ఉడికి మిశ్రమం దగ్గరకు వచ్చిన తర్వాత పసుపు, కారం, ఉప్పు, ఎండుమిర్చి పొడి వేయాలి. ఇప్పుడు కొన్ని నీళ్లు పోసి తక్కువ మంట మీద నూనె పైకి తేలేంతవరకు ఉడికించాలి. చల్లారిన తర్వాత ఈ మిశ్రమాన్ని మిక్సీలో వేసి నీళ్లు కలపకుండా మెత్తగా చేసుకోవాలి. చివరగా కడాయిలో నూనె పోసి వేడెక్కాక తాలింపు దినుసులన్నీ వేసి వేయించాలి. ఇందులో పచ్చడి వేసి రెండు, మూడు నిమిషాల పాటు ఉడికించాలి. నూనె కొంచెం ఎక్కువగా వేస్తే వారం రోజులపాటు నిల్వ ఉంటుంది. ఈ పచ్చడిని ఒక్కరోజు కోసం చేసుకుంటే నూనె తక్కువగా వేసుకోవచ్చు. ఇది అన్నంలోకే కాకుండా ఇడ్లీ, దోసెల్లోకి కూడా బాగుంటుంది.
పులుసు
కావాల్సినవి: చిన్నముక్కలుగా కోసిన ఉల్లిగడ్డలు- నాలుగు, చింతపండు- నిమ్మకాయంత, పొడవుగా కోసిన పచ్చిమిర్చి- మూడు, ధనియాల పొడి- టేబుల్‌స్పూన్‌, వెల్లుల్లి రెబ్బలు- ఆరు, కరివేపాకు, కొత్తిమీర- కొద్దిగా, పసుపు- పావు టీస్పూన్‌, మెంతులు- టీస్పూన్‌, కారం- టేబుల్‌స్పూన్‌, నూనె- రెండు టేబుల్‌స్పూన్లు, ఉప్పు- సరిపడా.
తయారీ విధానం: చింతపండును నీళ్లలో నానబెట్టుకోవాలి. స్టవ్‌ వెలిగించి కడాయి పెట్టి నూనె పోసి వేడిచేయాలి. దీంట్లో మెంతులు, చిదిమిన వెల్లుల్లి వేసి ఇవి వేగాక పచ్చిమిర్చి, ఉల్లిగడ్డలు వేసి వేయించాలి. దీంట్లో కొద్దిగా ఉప్పు వేస్తే త్వరగా వేగుతాయి. తర్వాత మంట తగ్గించి మూత పెడితే త్వరగా మగ్గుతాయి. ఇప్పుడు కరివేపాకు వేసి ఉల్లిగడ్డలను రంగు మారేంత వరకు వేయించాలి. తర్వాత పసుపు, కారం, చింతపండు పులుసు వేసి కలపాలి. పులుసు చిక్కగా ఉంటే కొన్ని నీళ్లు పోయాలి. దీంట్లో ధనియాల పొడి వేసి ఉప్పు, కారం సరిచూసుకోవాలి. ఇప్పుడు సన్నని మంట మీద పులుసును ఉడకనివ్వాలి. నూనె పక్కలకు వచ్చిందంటే ఉడికినట్టే. ఉల్లిగడ్డలను సన్నగా తరిగితే పులుసు చిక్కగా ఉంటుంది. చివరగా కొత్తిమీర తురుము వేసుకోవాలి.
