తలనొప్పి ప్రతీ ఒక్కరిలో సర్వసాధారణంగా వచ్చే సమస్య. మనలో చాలా మంది ఏదో ఒక సమయంలో ఈ సమస్యను ఎదుర్కొనే ఉంటారు. ఇందుకు నిద్రలేకపోవడం మొదలు ఎన్నో కారణాలున్నాయి. మనలో చాలా మంది తలనొప్పి రాగానే వెంటనే మందులు వేసుకుంటారు. అయితే ట్యాబ్లెట్‌ వేసుకుంటే వెంటనే ఉపశమనం లభించినా వాటివల్ల కలిగే దుష్ప్రభావాలూ అదే స్థాయిలో ఉంటాయి. అందుకే తలనొప్పిని వీలైనంత వరకు సహజ మార్గాల ద్వారానే తగ్గించుకోవాలని నిపుణులు చెబుతున్నారు. పెయిన్‌ కిల్లర్స్‌కి అలవాటు పడడం ఏమాత్రం మంచిది కాదని నిపుణులు చెబుతున్నారు. ఇంతకీ తలనొప్పిని తగ్గించే ఆ నేచురల్‌ టిప్స్‌ ఏంటో ఇప్పుడు తెలుసుకుందాం..
– ఉదయం నిద్రలేవగానే తలనొప్పిగా ఉండే వెంటనే మనలో చాలా మంది చేసే పని టీ తాగడం. అయితే టీకి బదులు తులసి టీ తాగడం వల్ల మెరుగైన ఫలితం పొందొచ్చని నిపుణులు చెబుతున్నారు. ఇందుకోసం కొన్ని తులసి ఆకులను తీసుకొని నీటిలో మరిగించి తీసుకోవాలి. దీనివల్ల తలనొప్పి నుంచి ఉపశమనం లభిస్తుంది.
– తలనొప్పికి డీహైడ్రేషన్‌ కూడా ఒక కారణం. తగినంత నీరు తీసుకోకపోతే తలనొప్పి సమస్య వేధిస్తుందని నిపుణులు చెబుతున్నారు. అందుకే కచ్చితంగా ప్రతీ రోజూ 3 నుంచి 4 లీటర్ల నీటిని తీసుకోవాలని సూచిస్తున్నారు.
– నిద్రలేమి కూడా తలనొప్పికి దారి తీస్తుందని నిపుణులు చెబుతున్నారు. కాబట్టి కచ్చితంగా రోజు 7 నుంచి 8 గంటల నిద్ర ఉండేలా చూసుకోవాలి.
– స్మార్ట్‌ ఫోన్‌ వాడకం పెరగడం, గంటలతరబడి కంప్యూటర్ల ముందు కూర్చోవడం కూడా ఒక కారణం. అయితే ఈ సమస్యకు చెక్‌ పెట్టాలంటే గ్యాడ్జెట్ల వినియోగాన్ని తగ్గించాలి.
– ఒత్తిడితో కూడుకున్న జీవితం కూడా తలనొప్పికి కారణమవుతుంది. అందుకే ఒత్తిడిని దూరం చేసుకునేందుకు యోగా, మెడిటేషన్‌ వంటి వాటిని అలవాటుగా మార్చుకోవాలని నిపుణులు చెబుతున్నారు.
