నవతెలంగాణ హైదరాబాద్: అక్షర యోగ కేంద్రం, దాని వ్యవస్థాపకుడు మరియు గౌరవనీయమైన యోగి హిమాలయన్ సిద్ధా అక్షర్ యొక్క నాయకత్వంలో, ఈ అంతర్జాతీయ యోగా దినోత్సవ వేళ 5 కొత్త గిన్నిస్ ప్రపంచ రికార్డులను సృష్టించడం ద్వారా చరిత్రను లిఖించింది. బెంగళూరులోని అక్షర యోగ కేంద్రంలో జరిగిన కార్యక్రమంలో ప్రపంచ రికార్డులను నెలకొల్పేందుకు వివిధ రంగాలకు చెందిన వేలాది మంది యోగా అభ్యాసకులు మరియు ఔత్సాహికులు నౌకాసనం, కౌండిన్యాసనం, హనుమానాసనం, చక్రాసనం, నటరాజసనం, ఏకపాదాసనం మరియు సూర్య నమస్కారంతో సహా 5 విభిన్న యోగాసనాలను ప్రదర్శించారు.
ఇండియన్ ఆర్మీ, ఎన్ సిసి , ఎయిర్ ఫోర్స్, కర్నాటక రాష్ట్ర పోలీసు సభ్యులు, అలాగే ప్రత్యేక అవసరాలు కలిగిన వ్యక్తులు, అనాథ శరణాలయాల నుండి పిల్లలు మరియు వ్యాపార , కార్పొరేట్ కమ్యూనిటీ సభ్యులతో సహా పెద్ద సంఖ్యలో యోగాభ్యాసకులు పాల్గొనడం ద్వారా ఈ రికార్డ్ లను నెలకొల్పారు. “ఆసనాలు మరియు టెక్నీక్స్ తో పాటు, యోగా అనేది ఒక వ్యక్తి యొక్క మానసిక మరియు శారీరక ఆరోగ్యం యొక్క మొత్తం శ్రేయస్సు కోసం ఒక సంపూర్ణ భావన. యోగా దినోత్సవం సందర్భంగా 20 విభిన్న దేశాల ప్రజల భాగస్వామ్యంతో 5 కొత్త గిన్నిస్ ప్రపంచ రికార్డులను సృష్టించడం యోగా యొక్క అసమానమైన శక్తికి నిదర్శనం. యోగాసనాలు, ప్రతి ఒక్కరికి, ముఖ్యంగా మహిళలకు, రోజువారీ జీవితంలో అనేక సవాళ్లను ఎదుర్కొనేందుకు తోడ్పడుతూనే అపారమైన ఆరోగ్య ప్రయోజనాలను అందిస్తాయి ”అని హిమాలయన్ సిద్ధా అక్షర్ అన్నారు.
ఏడు గిన్నిస్ ప్రపంచ రికార్డుల సాధనకు అధికారిక ప్రకటన తర్వాత, కమ్యూనికేషన్ల మంత్రిత్వ శాఖ ఆధ్వర్యంలోని పోస్ట్‌ల శాఖ ప్రత్యేక కవర్, పోస్ట్‌మార్క్‌ను జారీ చేయనుందని అక్షర్ తెలిపారు. వారాలపాటు సమగ్ర శిక్షణను అనుసరించి, ఈ రికార్డ్ ఫీట్ లలో పాల్గొన్నవారు 30 సెకన్ల నుండి 5 నిమిషాల వరకు 5 వేర్వేరు ఆసనాలను నిర్వహించారు. విజయవంతమైన ఈవెంట్ యోగా పట్ల అక్షర యోగ కేంద్రం యొక్క నిబద్ధతకు నిదర్శనం. అక్షర యోగ కేంద్రం గత సంవత్సరం వరుసగా 45 సెకన్లు, 60 సెకన్లు మరియు 90 సెకన్ల వ్యవధిలో వశిష్టాసనం, ఉష్ట్రాసనం మరియు హలాసనం అనే మూడు వేర్వేరు యోగా ఆసనాలను ప్రదర్శించి గిన్నిస్ బుక్ ఆఫ్ వరల్డ్ రికార్డ్స్‌లోకి ప్రవేశించింది.
