– బ్రెజిల్‌ అధ్యక్షులు
న్యూఢిల్లీ: తాను అధ్యక్ష పదవిలో ఉన్నంత వరకు బ్రెజిల్‌లో రష్యా అధ్యక్షులు వ్లాదిమిర్‌ పుతిన్‌ అరెస్ట్‌ జరగదని ఆ దేశ అధ్యక్షులు లూయిజ్‌ ఇనాసియో లూలా డి సిల్వా తెలిపారు. వచ్చే ఏడాది జి20 సమావేశాలు బ్రెజిల్‌లో జరుగనున్నాయి. ఈ నేపథ్యంలో 2024లో తమ దేశంలో జరిగే జి20 సమావేశాలకు రష్యా అధ్యక్షుడు వ్లాదిమిర్‌ పుతిన్‌ హాజరవుతారని, అక్కడ పుతిన్‌ అరెస్టయ్యే అవకాశమే లేదని ఆయన తేల్చి చెప్పారు.
ఉక్రెయిన్‌- రష్యా వివాదం నేపథ్యంలో యుద్ధ నేరాల చట్టం కింద అంతర్జాతీయ న్యాయస్థానం రష్యా అధ్యక్షులు వ్లాదిమిర్‌ పుతిన్‌కు అరెస్ట్‌ వారెంట్‌ జారీచేసి సంగతి తెలిసిందే. ఈ ఏడాది మార్చిలో పుతిన్‌కు అరెస్ట్‌ వారెంట్‌ జారీ అయినప్పటి నుంచి పుతిన్‌ విదేశాల్లో పర్యటించడం లేదు. భారత్‌లో ముగిసిన జి20 సమావేశాలకు కూడా పుతిన్‌ హాజరుకాలేదు. ఈ నేపథ్యంలో బ్రెజిల్‌ అధ్యక్షుడి వ్యాఖ్యలు ప్రాధాన్యం సంతరించుకున్నాయి.
