నిమ్స్‌లో చిన్నారులకు ఉచిత గుండె ఆపరేషన్లు

– వారం రోజులపాటు నిర్వహించనున్న బ్రిటన్‌ వైద్య బృందం
– చార్లీస్‌ హార్ట్‌ హీరోస్‌ క్యాంప్‌ పేరుతో నిర్వహణ
–  ఈ నెల 24-30వ తేదీ వరకు మిలీనియం బ్లాక్‌లో ప్రత్యేక శిబిరం ఏర్పాటు
నవతెలంగాణ-సిటీబ్యూరో
హైదరాబాద్‌లోని పంజాగుట్ట నిమ్స్‌ ఆస్పత్రిలో చిన్నారులకు ఉచితంగా వారం రోజుల పాటు గుండె ఆపరేషన్లు చేయనున్నట్టు ఆస్పత్రి డైరెక్టర్‌ బీరప్ప ఓ ప్రకటనలో పేర్కొన్నారు. అప్పుడే పుట్టిన వారి నుంచి, ఐదేండ్లలోపు చిన్నారులకు గుండెలో రంధ్రం, ఇతర గుండె సంబంధిత వ్యాధులు ఉంటే చికిత్స అందించనున్నట్టు తెలిపారు. బ్రిటన్‌ డాక్టర్‌ రమణ దన్నపునేని ఆధ్వర్యంలో 10 మంది వైద్య బృందంతోపాటు నిమ్స్‌ కార్డియో థోరాసిక్‌ విభాగాధిపతి అమరేశ్వరరావు, వైద్య బృందంతో పాటు నిలోఫర్‌ హాస్పిటల్‌ వైద్యులు కూడా ఈ ప్రత్యేక శిబిరంలో పాలుపంచుకోనున్నట్టు తెలిపారు. చార్లీస్‌ హార్ట్‌ హీరోస్‌ క్యాంప్‌ పేరుతో ఈ నెల 24 నుంచి 30వ తేదీ వరకు నిమ్స్‌ హాస్పిటల్‌లోని మిలీనియం బ్లాక్‌లో బ్రిటన్‌కు చెందిన వైద్య బృందం ప్రత్యేక శిబిరంలో ఆపరేషన్లు చేయనున్నట్టు తెలిపారు. మరిన్ని వివరాలకు 040-23489025 నెంబర్‌లో ఉదయం 9 గంటల నుంచి మధ్యాహ్నం 2 గంటల వరకు సంప్రదించొచ్చని పేర్కొన్నారు.