– రాష్ట్రవ్యాప్తంగా 17 వరకు నిర్వహణ
నవతెలంగాణ బ్యూరో – హైదరాబాద్‌
రాష్ట్రంలో శనివారం నుంచి 17వ తేదీ వరకు జయశంకర్‌ బడిబాట కార్యక్రమం జరగనుంది. పాఠశాల విద్యాశాఖ ఇప్పటికే మార్గదర్శకాలను విడుదల చేసిన విషయం తెలిసిందే. రాష్ట్రంలో ప్రభుత్వ, ప్రయివేటు, ఎయిడెడ్‌ పాఠశాలలు ఈనెల 12వ తేదీ నుంచి పున:ప్రారంభం కానున్నాయి. శనివారం నుంచి ఈ నెల తొమ్మిదో తేదీ వరకు విద్యార్థుల నమోదు ప్రక్రియ ఉంటుంది. ప్రతిరోజూ ఉదయం ఏడు నుంచి 11 గంటల వరకు ఉపాధ్యాయులు ఇంటింటికీ తిరిగి క్యాంపెయిన్‌ చేపట్టాలి. ఈనెల 12 నుంచి 17వ తేదీ వరకు రోజువారీ కార్యక్రమాలను నిర్వహించాలి. బడిబాట కార్యక్రమంలో జిల్లా మంత్రులు, ఎంపీలు, ఎమ్మెల్సీలు, ఎమ్మెల్యేలు, జిల్లా పరిషత్‌ చైర్మెన్లు, జిల్లా గ్రంథాలయ సంస్థ చైర్మెన్లు, ఇతర ప్రజాప్రతినిధులను భాగస్వాములను చేయాల్సి ఉంటుంది. కలెక్టర్ల నేతృత్వంలో డీఈవోలు కోఆర్డినేటర్లుగా వ్యవహరించాలని, ఉపాధ్యాయ సంఘాలను, సామాజిక సంఘాలు, స్వచ్ఛంద సంస్థలను భాగస్వామ్యం చేయాలి. మండలం, జిల్లాల్లోని పాఠశాలల వారీగా ఈ కార్యక్రమం నిర్వహణకు ముందస్తు ఏర్పాటు చేసుకోవాలి. అన్ని ఆవాస ప్రాంతాల్లో గల బడిఈడు పిల్లలందర్నీ గుర్తించి సమీప ప్రభుత్వ పాఠశాలల్లో చేర్పించేందుకు ఉపాధ్యాయులు, ప్రధానోపాధ్యాయులు కృషి చేయాలి. సర్కారు బడుల్లో విద్యార్థుల సంఖ్యను పెంచడం, నాణ్యమైన విద్యను అందించడమే బడిబాట లక్ష్యమని తల్లిదండ్రులకు వివరించాలి. సమాజ భాగస్వామ్యంతో సర్కారు బడులను బలోపేతం చేయాలి. సమీపంలో ఉన్న అంగన్‌వాడీ కేంద్రాల్లోని ఐదేండ్ల వయస్సు పూర్తి చేసుకున్న పిల్లల్ని గుర్తించి ప్రభుత్వ పాఠశాలల్లో చేర్పించాలి. ఐదో తరగతి పూర్తి చేసుకున్న పిల్లల్ని ప్రాథమికోన్నత/ఉన్నత పాఠశాలలో చేర్పించాలి. విలేజ్‌ ఎడ్యుకేషన్‌ రిజిస్టర్‌ (వీఈఆర్‌)ను అప్‌డేట్‌ చేయాలి. తక్కువ ఎన్‌రోల్‌మెంట్‌ ఉన్న పాఠశాలలను గుర్తించి విద్యార్థుల సంఖ్య పెరిగేలా తల్లిదండ్రుల భాగస్వామ్యంతో ప్రత్యేక ప్రణాళిక సిద్ధం చేయాలి. బడిబయట ఉన్న పిల్లలను గుర్తించి వారి వయస్సుకు తగ్గ తరగతిలో చేర్పించాలి.
జయశంకర్‌ బడిబాట వివరాలు
తేది కార్యక్రమం
12.6.2023 మన ఊరు-మనబడి/ మనబస్తీ-మనబడి
13.6.2023 తొలిమెట్టు
14.6.2023 సామూహిక అక్షరాభ్యాసం
15.5.2023 ప్రత్యేక అవసరాలు గల పిల్లల నమోదు
16.5.2023 ప్రభుత్వ బడుల్లో ఆంగ్ల మాధ్యమం ప్రాధాన్యత
17.5.2023 బాలికా విద్య, కెరీర్‌ గైడెన్స్‌
