వెంకట్‌రెడ్డి మృతి పార్టీకి తీరనిలోటు : సీపీఐ(ఎం) రాష్ట్ర కార్యదర్శి తమ్మినేని వీరభద్రం
నవతెలంగాణ-హుజూర్‌ నగర్‌టౌన్‌
దేశంలో ప్రజాస్వామ్య పరిరక్షణ కమ్యూనిస్టుల తోనే సాధ్యమవుతుందని సీపీఐ(ఎం) రాష్ట్ర కార్యదర్శి తమ్మినేని వీరభద్రం అన్నారు. సూర్యాపేట జిల్లా హుజూర్‌నగర్‌ పట్టణ కేంద్రంలో శనివారం సీపీఐ(ఎం) సీనియర్‌ నాయకులు పులిచింతల వెంకటరెడ్డి మృతదేహాన్ని తమ్మినేని సందర్శించి పూలమాలలు వేసి నివాళులర్పించారు. అనంతరం ఆయన మాట్లాడుతూ.. పార్టీలో సుదీర్ఘకాలంగా పనిచేసిన వెంకట్‌రెడ్డి ఆకస్మిక మృతిచెందడం తీరని లోటన్నారు. ఆయన ఆశయ సాధన కోసం ప్రతి ఒక్కరూ కృషి చేయాలని పిలుపునిచ్చారు.
కాలానుగుణంగా మారుతున్న పరిస్థితుల నేపథ్యంలో దేశంలో తాత్కాలికంగా కమ్యూనిస్టులు కొంతమేర బలహీనపడినా చివరికంటా ప్రజల పక్షాన నిలబడి పోరాటం చేసేది కమ్యూనిస్టులే అని చెప్పారు. కమ్యూనిస్టు సిద్ధాంతానికి శాస్త్రీయత ఉన్నదని, మానవ మనుగడకు ఎంతగానో దోహదపడుతుందని అన్నారు. ప్రజా సమస్యల పరిష్కారం కోసం రాష్ట్రంలో ఇటీవల సీపీిఐ, సీపీఐ(ఎం) ఉమ్మడిగా సమావేశం జరిపి ఐక్య ఉద్యమాలకు శ్రీకారం చుట్టామని చెప్పారు. ప్రజా ఉద్యమాలకు సంబంధించి రానున్న కాలంలో మరిన్ని పరిణామాలు ఏర్పడనున్నాయని తెలిపారు.
ప్రజా ఉద్యమాలకు తీరని లోటు..
పులిచింతల వెంకట్‌రెడ్డి మృతి ప్రజా ఉద్యమాలకు తీరని లోటని సీపీఐ(ఎం) రాష్ట్ర కార్యదర్శివర్గ సభ్యులు జూలకంటి రంగారెడ్డి, మల్లు లక్ష్మి, రాష్ట్ర నాయకులు నంద్యాల నర్సింహారెడ్డి, జిల్లా కార్యదర్శి మల్లు నాగార్జునరెడ్డి అన్నారు.
ఆయకట్టు ప్రాంతంలో రైతాంగ సమస్యల పరిష్కారం కోసం జరిగిన ప్రతి ఉద్యమంలో ఆయన పోషించిన పాత్ర మరువలేనిన్నారు.
పార్టీ ఇచ్చిన ప్రతి పిలుపులో ముందు వరుసలో నిలబడి పనిచేశారని కొనియా డారు. అనంతరం వెంకట్‌రెడ్డి అంతిమయాత్రలో వారు పాల్గొన్నారు. సీపీఐ(ఎం) జిల్లా కమిటీ సభ్యులు నాగారపు పాండు, నెమ్మాది వెంకటేశ్వర్లు, కొలిశెట్టి యాదగిరిరావు, పల్లా వెంకటరెడ్డి, దుగ్గి బ్రహ్మం, వట్టెపు సైదులు, షేక్‌.యాకోబ్‌, డి.రవి నాయక్‌, బుర్రి శ్రీరాములు, పారేపల్లి శేఖర్‌రావు, సీఐటీయూ జిల్లా ఉపాధ్యక్షులు శీలం శ్రీను, కౌన్సిలర్‌ త్రివేణి, నాయకులు, కార్యకర్తలు తదితరులు పాల్గొన్నారు.
ఎమ్మెల్యే సైదిరెడ్డి సంతాపం
సీపీఐ(ఎం) సీనియర్‌ నాయకులు వెంకట్‌రెడ్డి మృతి పట్ల స్థానిక ఎమ్మెల్యే శానంపూడి సైదిరెడ్డి సంతాపం వ్యక్తం చేశారు. మృతదేహాన్ని సందర్శించి పూలమాలవేసి నివాళులర్పించారు. ఆయన మన వెంట జెడ్పీటీసీ కొప్పుల సైదిరెడ్డి, బీఆర్‌ఎస్‌ పట్టణ అధ్యక్షులు చిట్యాల అమర్‌నాథరెడ్డి, ప్రధాన కార్యదర్శి బెల్లంకొండ అమర్‌, సీనియర్‌ నాయకులు అట్లూరి హరిబాబు ఉన్నారు. బీఆర్‌ఎస్‌, సీపీఐ, న్యూ డెమోక్రసీ, టీడీపీ, కాంగ్రెస్‌ పార్టీల నాయకులు వెంకటరెడ్డి అంతిమయాత్రలో పాల్గొని సంతాపం తెలిపారు. సంతాపం తెలిపిన వారిలో సీపీఐ రాష్ట్ర నాయకులు పశ్య పద్మ, ఎల్లావుల రాములు, కంబాల శ్రీనివాస్‌, కొప్పోజు సూర్యనారాయణ, ఒక్క వంతుల కోటేశ్వరరావు, ఎలక వెంకటేశ్వర్లు తదితరులు ఉన్నారు.
