నవతెలంగాణ – తమిళనాడు
అదుపుతప్పిన ఓ లారీ బీభత్సం సృష్టించి ఆరుగురి ప్రాణాలను బలి తీసుకుంది. రోడ్డు దాటుతున్న మూడు బైక్లపైకి లారీ దూసుకెళ్లిన ఘటనలో బైక్లపై ఉన్న ఆరుగురు అక్కడికక్కడే మృతి చెందారు. ఈ ఘోర ప్రమాదం తమిళనాడు.. చెంగల్పట్టు జిల్లాలోని పొతేరి సమీపంలో నేడు ఉదయం 9 గంటలకు చోటు చేసుకుంది. గమనించిన వాహనదారులు పోలీసులకు సమాచారం అందించారు. ఘటనాస్థలికి చేరుకున్న పోలీసులు మృత దేహాలను స్వాధీనం చేసుకున్నారు. పోస్ట్మార్టం పరీక్షల కోసం చెంగల్పట్టు ప్రభుత్వ ఆస్పత్రికి తరలించారు. ప్రమాదంలో మృతదేహాలు గుర్తుపట్టలేనంతగా నుజ్జునుజ్జయ్యాయని పోలీసులు తెలిపారు. బైక్లను ఢీకొట్టిన అనంతరం లారీ.. బారికేడ్ను ఢీకొట్టిందని పోలీసులు తెలిపారు. మృతులు వివరాలు ఇంకా తెలియరాలేదని చెప్పారు. మద్యం మత్తులో లేదా నిద్ర మత్తులో వాహనం నడపడం వల్లే ఈ ప్రమాదం చోటుచేసున్నట్లు ప్రాథమిక నిర్ధారణకు వచ్చినట్లు వెల్లడించారు. ప్రమాదానికి గల కారణాలపై ఆరా తీస్తున్నారు. ప్రమాదం జరిగిన ప్రాంతానికి స్థానికులు భారీగా చేరుకోవడంతో.. కాసేపు ట్రాఫిక్ జామ్ అయ్యింది. వారందరినీ పోలీసులు చెదరగొట్టారు.
