తల్లిదండ్రులందరూ పిల్లలను చాలా ప్రేమగా, అపురూపంగా పెంచాలని తాపత్రయ పడతారు. వారు జీవితంలో సరైన మార్గంలో వెళ్లాలని కూడా కోరుకుంటారు. అయితే కొంతమంది తెలియకుండానే పిల్లలను కొన్ని విషయాల్లో బాగా గారాబం చేయడం, కొన్ని విషయాల్లో మరింత కఠినంగా ప్రవర్తించడం చేస్తారు. దీని వల్ల చాలా సమస్యలు ఎదుర్కోవల్సి వస్తుందంటున్నారు మానసిక నిపుణులు. అలా సమస్యలు రాకుండా పిల్లలు క్రమశిక్షణతో పాటు చదువులో కూడా ఉన్నమైన స్థానానికి చేరేలా తీర్చిదిద్దడానికి
కొన్ని చిట్కాలు చెబుతున్నారు. అవేంటో చూద్దాం…
పిల్లల ఎదుగదలను చూసి మురిసిపోని తల్లిదండ్రులు ఉండరు. అయితే తెలియకుండానే వాళ్లకి కొన్ని విషయాల్లో అతిగా స్వేచ్ఛను ఇస్తుంటారు. మరికొంతమంది పిల్లలకు అస్సలు స్వేచ్ఛ ఇవ్వకుండా ప్రతిదీ తాము చెప్పిన్నట్లే చేయాలని విపరీతమైన ఒత్తిడి తెస్తుంటారు. ఇలాంటి పరిస్థితుల్లో పిల్లలు మన మాట లెక్కచేయకపోవడం లేదా అతి క్రమశిక్షణ వల్ల యాక్టివ్‌గా లేకపోవడం వంటి దుష్ప్రభవాలు కలిగే అవకాశం ఉంది. దాంతో పిల్లలు తల్లిదండ్రుల మాట లెక్కచేయడం మానేసి వారికి నచ్చినరీతిలో వారు ఉంటారు. అంతేకాకుండా వారికొచ్చే చిన్న చిన్న ఇబ్బందులను కూడా మనతో షేర్‌ చేసుకోవడం తగ్గించి వారికి వారే సొంత నిర్ణయాలు తీసుకొని పెడదారిన పడే అవకాశం కూడా లేకపోలేదు.
పాజిటివిటీ పెంపొందించండి
మొదటగా పిల్లల్లో పాజిటివిటీ పెంచాలి. చదువులో గాని, ఆటల్లో గాని వారికి కావాల్సిన ప్రేరణను మనం వారికి అందించాలి. తద్వారా వారిలో ఏదైనా సాధించగలం అనే పాజిటివిటీ పెరుగుతుంది. ఇది వారు జీవితంలో ఉన్నత శిఖరాలకు చేరేందుకు చాలా ముఖ్యం. ప్రతీ విషయానికి వాళ్ల మీద చిరాకు పడడం అంత మంచిది కాదు. ఇది వారు చెడు మార్గం వైపు వెళ్లే పరిస్థితి ఏర్పడుతుంది.
సహాయపడే గుణం..
పిల్లలకు చిన్నప్పటి నుండి సహాయపడే గుణాన్ని అలవాటు చేయాలి. చిన్నతనం నుండి వారిలో స్వార్ధాన్ని నూరిపోయకూడదు. ఇతరుల అవసరాలకు స్పందించేలా వారిని ప్రోత్సహించాలి. దాంతో వారు అందరితో కలివిడిగా ఉంటూ స్నేహపూరిత వాతావరణాన్ని అలవాటు చేసుకుంటారు. తద్వారా వారు ఒంటరిగా ఉన్నామనే భావనను కోల్పోయి ఉత్సాహంగా ఉంటారు. కాబట్టి వారిలో ఏదో సాధించాలనే ఆశయంతో పాటు ఇతరులకు సహాయపడాలనే తపన కూడా ఉండేలా ప్రోత్సహించాలి. దీనివల్ల పిల్లల్లో లీడర్‌షిప్‌ క్వాలిటీస్‌ కూడా పెరుగుతాయి.
అనవసరంగా కోపగించుకోవడం
కొన్ని సందర్భాల్లో పిల్లలపై తెలియకుండానే కోపాన్ని ప్రదర్శిస్తాం. ఉదాహరణకు వారు మన కండ్ల ముందే ఏదైనా గోడ ఎక్కడం లేదా ప్రమాదకర వస్తువులతో ఆడుకోవడం వంటివి చేసినప్పుడు పట్టరాని కోపం వస్తుంది. అయితే ఇలాంటి సందర్భాలలో మనం కొంచెం నిగ్రహంగా ఉంటూ వారిని దగ్గరకు తీసుకొని అలా చేయకూడదని నెమ్మదిగా చెప్పాలి. దాని వల్ల జరిగే అనర్ధాలను పిల్లలకు వివరించాలి. మనం ఎంత ఎక్కువ వారి మీద కోపం పెంచుకుంటే వారు అంత మొండిగా తయారయ్యే ప్రమాదం ఉంది. వారి అలవాటును మనం వ్యతిరేకిస్తే పిల్లలు సహించలేరు. అందుకే ముందుగా వారితో మంచిగా మాట్లాడి మచ్చిక చేసుకోవాలి.
చిన్న చిన్న బాధ్యతలు అప్పగించండి
పిల్లలు ఇంట్లో ఉన్నప్పుడు వారి చదువుకే ప్రాధాన్యం ఇస్తా రందరూ. ఎంత చదివితే అంతర ప్రయోజనం అని భావి స్తారు. అయితే పిల్లలకు చదువుతోపాటు ఇంట్లో చిన్న చిన్న బాధ్యతలను కూడా అప్పజెప్పాలి. దీనివల్ల వారిలో కృషి, పట్టు దల పెరిగి సంఘంలో ఎలా నడుచుకోవాలో చిన్నప్పటి నుండే తెలుస్తుంది. రోజూ మన ఇంటిలో ఉండే కొన్ని బాధ్యతలను వారు క్రమం తప్పకుండా నిర్వర్తించేలా వారిని ప్రేరేపించాలి.
జీవిత భాగస్వామితో బలమైన బంధం
భార్యభర్తల మధ్య సఖ్యతలేని పిల్లలకంటే అన్యూన్యంగా ఉండే భార్యభర్తల పిల్లలు జీవితంలో విజయం సాధిస్తారని చాలా అధ్యయనలు తెలుపుతున్నాయి. భార్యభర్తల సఖ్యతగా ఉండడం అనేది కూడా పిల్లల ఎదుగుదలకు దోహద పడుతుంది. సాధా రణంగా చాలామంది పిల్లలు అమ్మతోనో లేదా నాన్నతోనో చనువుగా ఉంటారు. ఇంకొకరితో పెద్దగా మాట్లాడరు. వారికి సంబంధించిన ఏ విషయం కూడా షేర్‌ చేసుకోరు. ఇలా కాకుండా ఇద్దరితో సమానంగా వారి అభిప్రాయాలను పంచుకునేలా వారికి తెలియజేయాలి. వారికి జీవితంలో ఎటువంటి ప్రమాదం వచ్చినా తల్లిదండ్రులు ఇద్దరి దగ్గర కష్టాన్ని చెప్పుకునేలా చిన్నప్పటి నుండి పిల్లల్ని ప్రోత్సహించాలి.
సవాళ్లను అధిగమించేలా…
పిల్లలు ఏదైనా సాధించాలనే గుణాన్ని వారికి చిన్నప్పటి నుండే నేర్పించాలి. వారు ఎప్పుడూ ఏదో ఒక గోల్‌ పెట్టుకొని దాని మీద ఫోకస్‌ చేసేలా వారికి తర్ఫీదు ఇవ్వాలి. ఎటువంటి సావాళ్లనైనా భయపడకుండా ధైర్యంగా స్వీకరించేలా ప్రోత్సహించాలి. ఏ పనినైనా కష్టంతో కాకుండా ఇష్టంగా చేయడం నేర్పాలి. ఇది వారిలో పోరాట పటిమను పెంపొందించి జీవితంలో ఏదైనా సాధించాలనే తపనను చిన్నపటి నుండి బలంగా నాటుతుంది.
కోపం తగ్గించుకోవడానికి చిట్కాలు
– అత్యవసరమయితే తప్ప పిల్లలపై కోపం తెచ్చుకోకూడదు
– కోపం తగ్గకపోతే కొంత సమయం పాటు అక్కడి నుండి వేరే దగ్గరకు వెళ్లి కోపం తగ్గాక తిరిగి రండి.
– మీకు కోపం వచ్చినప్పుడు ఐదు సార్లు గట్టిగా శ్వాస తీసుకోండి. ఇలా చేయడం ద్వారా మీరు మీ కోపాన్ని అదుపు చేసుకోవచ్చు.
– పిల్లలను బెదిరించడం మానేయండి
ఈ చిట్కాలు పాటించి మీరు మీ పిల్లలపై కోపాన్ని తగ్గించుకొని వారిని సరైన మార్గంలో నడిపించవచ్చు.
ఒత్తిడిని నియంత్రించుకోవడం
మనలో చాలామంది మన దైనందిక జీవితంలో ఉండే ఒత్తిడి ప్రభావాన్ని మన కుటుంబసభ్యలపై లేదా పిల్లలపై చూపిస్తుంటాం. ఇది పిల్లల్లో మన పట్ల నెగిటివిటీని పెంచుతుంది. దాంతో వారు క్రమక్రమంగా మనల్ని శత్రవుల్లా చూడటం ప్రారంభిస్తారు. అందుకోసమే మన ఒత్తిడిని, కోపాన్ని వారి మీద చూపించకూడదు. మనం మన పనిలో ఎంత ఒత్తిడిలో ఉన్నా వారిని మాత్రం ప్రేమగానే దగ్గరకు తీసుకొని మాట్లాడం అలవరచుకోవాలి. ఇలా చేయడం వల్ల వారు మనపై ఉండే భయాన్ని కోల్పోయి ప్రతీ విషయాన్ని మనతో షేర్‌ చేసుకోవడం అలవాటు చేసుకుంటారు. పై సూచనలు మీ పిల్లలు జీవితంలో ఉన్నత శిఖరాలకు చేరేలా ప్రోత్సహించేందుకు, చిన్నప్పటి నుండి వారు ఉన్నతమైన మార్గంలో పయనించేందుకు చాలా ముఖ్యమైనవని అంటున్నారు పిల్లల నిపుణులు.
