ఆర్యన్‌గౌరా, మిస్తీ చక్రవర్తి జంటగా నటించిన చిత్రం ‘ఓ సాథియా’. దివ్యభావన దర్శకత్వం వహించిన ఈ చిత్రాన్ని తన్వికా-జశ్వికా క్రియేషన్స్‌ పతాకంపై సుభాష్‌ కట్టా, చందన కట్టా నిర్మించారు. ఈనెల 7న ఫీల్‌గుడ్‌ లవ్‌స్టోరీగా విడుదలైన ఈ సినిమాకి ప్రేక్షకులనుండి మంచి స్పందన లభిస్తుండటంతో చిత్ర బృందం సక్సెస్‌మీట్‌ ఏర్పాటు చేసింది.
దర్శకురాలు దివ్యభావన మాట్లాడుతూ,’మా సినిమాకి వచ్చిన చక్కటి రెస్పాన్స్‌ చూసి చాలా ఆనందపడ్డాను. కానీ చాలా చోట్ల, చాలా జిల్లాల్లో ఈ సినిమా థియేటర్లలో విడుదల కాలేదని డిప్రెషన్‌కి లోనయ్యాను’ అని అన్నారు.
‘సినిమా చూసిన ప్రతి ఒక్కరూ సినిమా గురించి గొప్పగా మాట్లాడుతుండటంతో రెండోవారంలో థియేటర్లను పెంచుతున్నాం. మంచి కాన్సెప్ట్‌తో చేసిన ఈ సినిమా మరింత మంచి విజయం సాధిస్తుందని ఆశిస్తున్నాం’ అని నిర్మాత సుభాష్‌ కట్టా చెప్పారు.
హీరో ఆర్యన్‌ మాట్లాడుతూ,’ ‘నేనూ, మా హీరోయిన్‌ థియేటర్లకు వెళ్లి పబ్లిక్‌ టాక్‌ను, రెస్పాన్స్‌ను కళ్లారా చూశాం. వారి స్పందన చూసిన తర్వాత సినిమా రెండో వారం నుండి పెద్ద ఎత్తున సక్సెస్‌ సాధిస్తుందని నమ్ముతున్నాను. ఈ వారం మంచి థియేటర్లను సంపాదించి మీ ముందుకు వస్తున్నాం. ప్రేక్షకులు ఆదరించి మా చిన్న సినిమాను బ్రతికించాలని కోరుకుంటున్నా’ అని తెలిపారు.
