థైరాయిడ్‌… ఎక్కువగా వినిపిస్తున్న మాట. ఈ మధ్య కాలంలో పది మందిలో కనీసం ఇద్దరైనా ఈ సమస్యతో బాధ పడుతున్నారు. అంతగా ఈ సమస్య పెరిగిపోయింది. వయసు తో సంబంధం లేకుండా దీని బారిన పడుతున్నారు. ఇక మహిళలకైతే చెప్పాల్సిన పని లేదు. ముఖ్యంగా యుక్త వయసు అమ్మాయిల్లోనే థైరాయిడ్‌ సమస్యలు ఎక్కువగా ఏర్పడుతున్నాయని ఓ సర్వేలో తేలింది. అందుకే మహిళలంతా థైరాయిడ్‌ గురించి వీలైనంత స్పష్టంగా తెలుసుకోవడం చాలా మంచిది.
రక్తంలో థైరాక్సిన్‌ హార్మోన్‌ శాతం తక్కువగా ఉండటం వల్లే థైరాయిడ్‌ సమస్య ఏర్పడుతుంది. ఈ సమస్య వచ్చిందనడానికి కొన్ని సూచనలు ఉన్నాయి. కాస్త పనికే అలసిపోతుంటారు. ఎంతసేపు పడుకున్నా ఇంకా పడుకోవాలనిపిస్తుంది. ఏ పనీ చేయాలనిపించదు. ఉన్నట్టుండి బరువు పెరగడమో లేక తగ్గిపోవడమో మొదలవుతుంది. విసుగు, కోపం ఎక్కువవుతుంటాయి. గుండె దడ, టెన్షన్‌ పెరుగుతాయి. కొందరిలో రుతుస్రావంలో కూడా మార్పులు కనిపిస్తాయి. రుతుస్రావం అధికంగా అవ్వడం, నెలలో ఒకసారి కంటే ఎక్కువసార్లు రావడం వంటివి ఏర్పడుతుంటాయి. లేదంటే రావాల్సిన సమయానికి రాకపోవడం, వచ్చినా సరిగ్గా అవ్వకపోవడం వంటివి కూడా ఇందులో భాగమే. జుట్టు రాలిపోవడం, చర్మం పొడిబారిపోవడం వంటి సమస్యలు కూడా కొందరిలో కనిపిస్తాయి. కండరాల నొప్పులు కూడా రావొచ్చు. కొందరిలో గొంతు కూడా మారుతుంది. వీటిలో ఏ లక్షణాలు కనిపించినా వెంటనే డాక్టర్‌ని సంప్రదించడం మంచిది.
థైరాయిడ్‌ సమస్య ఏర్పడిందనగానే కంగారు పడిపోకూడదు. మొదట వచ్చినది ఏ రకమైన సమస్య అనేది తెలుసుకోవాలి. హైపో థైరాయిడిజమ్‌ అయితే థైరాయిడ్‌ గ్రంథి పనితీరు తగ్గిపోవడం వల్ల ఏర్పడుతుంది. హైపర్‌ థైరాయిడ్‌ గ్రంథి అయితే చేయాల్సిన దాని కన్నా ఎక్కువగా చేయడం వల్ల వస్తుంది. మీకు ఏర్పడింది ఏ రకమైన సమస్యో తెలుసుకుంటే ఎలాంటి జాగ్రత్తలు తీసుకోవాలో తెలుస్తుంది. అందుకే తప్పనిసరిగా డాక్టర్‌ను సంప్రదించాలి.
థైరాయిడ్‌కి డాక్టర్‌ సూచించిన మందులతో పాటు పోషకాహారం తీసుకోవడం మంచి పరిష్కారం.
మాంసకత్తులు, విటమిన్లు పుష్కలంగా లభించే ఆహారాన్ని తీసుకోవాలి.
బి విటమిన్‌ ఎక్కువగా ఉండే పాలు, పాల ఉత్పత్తులు, రాగి జావ లాంటివి మేలు చేస్తాయి.
ఇనుము ఎక్కువగా ఉండే గుడ్లు, ఆకు కూరలు, ఖర్జూరం వంటివి తీసుకోవడం వల్ల నీరసం, అలసట తగ్గుతాయి.
సోయా గింజలు, పాలకూర, వెల్లుల్లి, తణధాన్యాలు, మొలకెత్తిన విత్తనాలు ఆహారంలో ఉండేలా చూసుకోవాలి.
జంక్‌ ఫుడ్‌కి పూర్తి దూరంగా ఉండండి. ఉప్పు విషయంలో అన్నిటికంటే ఎక్కువ జాగ్రత్తగా ఉండాలి.
వ్యాయామం కూడా తప్పనిసరి. మందులు వాడుతూ, పోషకాహారం తీసుకుంటూ, క్రమం తప్పకుండా వ్యాయామం చేస్తూ ఉంటే థైరాయిడ్‌ సమస్యను అధిగమించవచ్చు.
