నవతెలంగాణ – హైదరాబాద్
హైదరాబాద్ మెట్రోపాలిటన్ డెవలప్ మెంట్ అథారిటీ (హెచ్ఎండీఏ) మరోమారు భూముల వేలానికి సిద్ధమైంది. మూడు జిల్లాల్లోని ప్రభుత్వ భూములను అమ్మేందుకు బుధవారం నోటిఫికేషన్ జారీ చేసింది. రంగారెడ్డి, సంగారెడ్డి, మేడ్చల్ – మల్కాజ్ గిరి జిల్లాల్లోని భూములను వేలం వేయనున్నట్లు తెలిపింది. రంగారెడ్డి జిల్లాలోని బైరాగిగూడ, మంచిరేవుల, కోకాపేట, నల్లగండ్ల, బుద్వేల్, చందానగర్, పీరంచెరువులోని భూములను అమ్మకానికి పెట్టింది. సంగారెడ్డిలో వెలిమల, అమీన్ పూర్, నందిగామ, పతిఘనపూర్, కిష్టారెడ్డిపేటలతో పాటు మేడ్చల్ – మల్కాజ్ గిరిలోని బాచుపల్లి, బౌరంపేట, చెంగిచెర్ల, సూరారం ప్రాంతాల్లోని భూములను విక్రయించనుంది. నోటిఫికేషన్ లో వెల్లడించిన వివరాల ప్రకారం ఈ భూములకు చదరపు గజానికి కనీస ధర రూ.12 వేలు, గరిష్ఠ ధర రూ.65 వేలుగా హెచ్ఎండీఏ నిర్ణయించింది. ఆన్ లైన్ లో జరగనున్న ఈ వేలంలో పాల్గొనేందుకు ఈ నెల 16 లోగా రిజిస్ట్రేషన్ చేసుకోవాలని అధికారులు సూచించారు. ఈ నెల 18 నుంచి ఈ-వేలం ద్వారా భూముల విక్రయం జరగనుందని తెలిపారు. పూర్తి వివరాలకు హెచ్ఎండీఏ వెబ్ సైట్ సందర్శించాల్సిందిగా అధికారులు సూచించారు.
