సాధారణంగా ఉద్యోగంలో ఎదుగుదల లేకపోతే అసంతృప్తి పేరుకుపోతుంది. ఉన్నత స్థితిలోకి వెళ్లడం మన చేతిలో లేదు, ఆ నిర్ణయాలు యాజమాన్యానివే’ అనుకుంటారు చాలా మంది. అయితే పదోన్నతులు ఇచ్చేది పైవాళ్లే అయినా.. వాళ్లనందుకు ప్రేరేపించాల్సింది మనమే అంటున్నారు నిపుణులు. కెరియర్‌ని వృద్ధి చేసుకోవడానికి కొన్ని సూచనలు చేస్తున్నారు. అవేంటో తెలుసుకుందాం…
అప్పగించిన పనులను బాధ్యతగా చేయండి. వంక పెట్టడానికి లేదు అనిపించేలా వుండాలి మనం చేసే పనులు.
పనులను ప్రణాళికాబద్ధంగా చేయడం వల్ల త్వరగా పూర్తవుతాయి. ఏది ముందు, ఏది తర్వాత అనే ప్రాధాన్యతలూ తెలుస్తాయి.
చేస్తున్న పనిలో చాకచక్యంతో బాటు నైపుణ్యాలు పెంచుకోవాలి. ఏదైనా రిపోర్ట్‌ ఇవ్వాల్సివచ్చినప్పుడు అంశాలు క్రమ పద్ధతిలో, సరళంగా, అర్థమయ్యేలా వ్యక్తీకరించాలి. చెప్పాల్సిన సంగతులూ అంతే.. అధిక ప్రసంగం లేకుండా క్లుప్తంగా, స్పష్టంగా ఉండాలి.
నిర్ణయం తీసుకోవాల్సిన సందర్భాల్లో ముందుగానే బాగా ఆలోచించుకోవాలి. ఒకసారి నిర్ధారించుకున్న తర్వాత ఇక సందేహాలూ, సంశయాలకు తావుండకూడదు.
సామర్థ్యాన్ని రోజురోజుకూ పెంచుకోవాలి. అప్పుడే ప్రగతి సాధ్యమవుతుంది. అందుకే కొత్త విషయాలు తెలుసుకోవడానికి ప్రాధాన్యం ఇవ్వాలి.
సంక్లిష్టత ఏర్పడిన సందర్భాల్లో పైవాళ్ల సలహాలూ సహకారం తీసుకోవచ్చు. అంతే తప్ప డీలా పడిపోయి కుంగిపోవద్దు.
మనసులో మెదిలే భావాలూ లేదా సంఘర్షణలను అందరితో పంచుకోవద్దు. అవి రూపాంతరం చెంది ఎవరెవరికో చేరి మీమీద సదభిప్రాయం పోగొట్టే ప్రమాదముంది.
ఉద్యోగం అన్నాక ఎంతో కొంత ఒత్తిడి ఉంటుంది. రోజూ కాసేపు వ్యాయామం చేస్తే ఆ ఆందోళన తగ్గి మనసుకు ప్రశాంతంగా ఉంటుంది.
ఎట్టి పరిస్థితిలో నిరాశా నిస్పృహలకు చోటు ఇవ్వొద్దు. ఎప్పుడూ ఆశావహ దృక్పథంతోనే ఉండండి.
పని పూర్తిచేయడంతో సరిపెట్టక నలుగురితో కలిసిమెలిసి ఉండటం అలవాటు చేసుకోండి. సోషల్‌ స్కిల్స్‌ను పెంచుకోకపోతే పనిలో ఎంత నైపుణ్యం ఉన్నా వెనకే ఉండిపోతామని గుర్తుపెట్టుకోండి.
నీతి నియమాలను ఉల్లంఘించొద్దు. అప్పుడే మీ మీద అందరికీ సద్భావం పెరుగుతుంది. ఉన్నత బాధ్యతలు అప్పగించగలుగుతారు.
