‘బేబీ’ మూవీ కల్ట్‌ బ్లాక్‌ బస్టర్‌ సెలబ్రేషన్స్‌లో అగ్ర కథానాయకుడు అల్లు అర్జున్‌ ముఖ్య అతిథిగా పాల్గొని చిత్ర బృందానికి కంగ్రాట్స్‌ చెప్పారు. ‘నేను అనుకోకుండా నటుడిని అయ్యా. అయితే సినిమాలో మన క్యారెక్టర్‌ బాగా చేస్తే నటుడిగా గుర్తింపు వస్తుందని ఈ సినిమాతో ప్రూవ్‌ అయ్యింది’ అని హీరో ఆనంద్‌ దేవరకొండ చెప్పారు.
దర్శకుడు సాయి రాజేశ్‌ మాట్లాడుతూ, ‘బేబీ సినిమా చూసి ఐకాన్‌ స్టార్‌ ఇచ్చిన ఫీడ్‌ బ్యాక్‌తో మేము ఫుల్‌ జోష్‌లోకి వెళ్లిపోయాం. ఆయన ఒక కామన్‌ మాస్‌ ఆడియన్‌ ఎలా రియాక్ట్‌ అవుతాడో అలా రివ్యూ చెప్పారు. ఆయన చెప్పింది పదే పదే గుర్తుచేసుకుంటూ మా హీరో, హీరోయిన్స్‌కి ఆ విషయాలన్నీ షేర్‌ చేసుకున్నా. ఆయన చెప్పింది వింటుంటే ఒక రాజమౌళి మూవీ చూసిన ఫీలింగ్‌ కలిగింది. మేము మీకు రుణపడి ఉంటాం అల్లు అర్జున్‌ అన్నా. మీరు ఇచ్చిన సపోర్ట్‌తో ‘బేబీ’ రేపటి నుంచి థియేటర్లలో మరింత హౌస్‌ఫుల్‌ అవుతుంది’ అని చెప్పారు.
‘ఈ సినిమాకు థియేటర్‌లో వస్తున్న రెస్పాన్స్‌ చూసి నమ్మలేకపోయాం. మేము నటిస్తుంటే జనాలు ఇంతగా రియాక్ట్‌ అవుతారని ఊహించలేదు’ అని హీరో విరాజ్‌ అశ్విన్‌ అన్నారు.
హీరోయిన్‌ వైష్ణవి చైతన్య మాట్లాడుతూ, ‘అల్లు అర్జున్‌ నటన అంటే ఇష్టం. ఆయన నాకొక ఇన్సిపిరేషన్‌. నేను ఇవాళ బాగా నటించానని పేరొచ్చిందంటే అందులో ఆయన ఇచ్చిన స్ఫూర్తి కూడా ఉంటుంది. తెలుగు అమ్మాయిలకు అవకాశాలు రావనే పేరును బేబీ మార్చేసింది’ అని తెలిపారు. నిర్మాత ఎస్కేఎన్‌ మాట్లాడుతూ, ‘మా బన్నీనే మాకు అన్నీ. నాకే కాదు మా టీమ్‌లోని చాలా మందికి లైఫ్‌ ఇచ్చింది’ అని అన్నారు.
7జీ బృందావన్‌ కాలనీ, అర్జున్‌ రెడ్డి లాంటి కొన్ని సినిమాలే ప్రేమలోని బాధను తెలియజేస్తాయి. అలాంటి సినిమాలు తీయడం కష్టం. ఎందుకంటే అలాంటి లవ్‌ పెయిన్‌ చూపించే కథలు సులువుగా రావు. మన జీవితంలో చూస్తేనే, అనుభూతి చెందితేనే వస్తాయి. లైఫ్‌ నుంచి స్పూర్తి పొందితేనే బేబీ లాంటి సినిమా తీయగలం. కథ రాసిన విధానం, తెరకెక్కించిన విధానం, ఆర్టిస్టుల నటనా తీరు ఇలా ప్రతీది ఆకట్టుకుంది. వీళ్ల నటనలో ఎంతో జెన్యూనిటీ ఉంది. చిన్న సినిమాలను థియేటర్లలో ప్రేక్షకులు చూడటం లేదు అనేది అబద్ధం. సినిమా బాగుంటే మీడియా, ప్రేక్షకులు నిజాయితీగా మద్దతు, ప్రేమ ఇస్తారు. అందుకు బేబీ సక్సెస్‌ నిదర్శనం. దర్శకుడు సాయిరాజేష్‌ ఈ సినిమా కోసం బాగా కష్టపడ్డాడు.
– అల్లు అర్జున్‌
