– 75 మందిపై క్రిమినల్‌ కేసులు..
– అత్యధికమంది బీజేపీ సభ్యులే
న్యూఢిల్లీ : రాజ్యసభలోని మొత్తం 225 మంది సిట్టింగ్‌ ఎంపీల్లో 75 మందిపై క్రిమినల్‌ కేసులు నమోదయ్యాయని, మహిళలకు వ్యతిరేకంగా నేరాలపై నలుగురు ఎంపీలు విచారణను ఎదుర్కొంటున్నారని, వీరిలో అత్యధికంగా బీజేపీ ఎంపీలు ఉన్నారని ఓ నివేదిక తెలిపింది. 233 మంది రాజ్యసభ సభ్యుల్లో 225 మంది నేర వివరాలను విశ్లేషించి, అప్‌డేట్‌ చేసినట్టు అసోసియేషన్‌ ఫర్‌ డెమోక్రటిక్‌ రీఫామ్స్‌ (ఏడీఆర్‌) మరియు నేషనల్‌ ఎలక్షన్‌ వాచ్‌ (న్యూ)లు శుక్రవారం విడుదల చేసిన నివేదికలో పేర్కొన్నాయి. ప్రస్తుతం రాజ్యసభలో ఒక స్థానం ఖాళీగా ఉండగా, మరో ముగ్గురు ఎంపీల వివరాలు అందుబాటులో లేవని తెలిపింది. నాలుగు జమ్ముకాశ్మీర్‌ స్థానాలపై అనిశ్చితి నెలకొందని వివరించింది. మొత్తం 225 మంది రాజ్యసభ ఎంపీల్లో 75 మంది వివరాలను విశ్లేషించగా.. 33 శాతం మంది ఎంపీలపై క్రిమినల్‌ కేసులు ఉన్నట్టు తెలిపింది. రాజ్యసభ సిట్టింగ్‌ ఎంపీల్లో 18 శాతం మంది (41 మంది) తీవ్రమైన క్రిమినల్‌ కేసులు ఉన్నాయనీ, ఇద్దరు ఎంపీలపై హత్య కేసులు (ఐపీసీ 302) కూడా ఉన్నాయని పేర్కొంది. నలుగురు ఎంపీలపై మహిళలకు సంబంధించిన క్రిమినల్‌ కేసుల్లో విచారణను ఎదుర్కొంటున్నారు. వీరిలో అత్యధికంగా 23 మంది బీజేపీ ఎంపీలు ఉన్నట్టు నివేదిక వెల్లడించింది.మహారాష్ట్రకు చెందిన 19 మంది ఎంపీల్లో 12 మంది (63శాతం), బీహార్‌ నుంచి 16 మందిలో పది మంది (63శాతం), యూపీ నుంచి 30 మందిలో ఏడుగురు (23 శాతం), తమిళనాడుకు చెందిన 18 మందిలో (33 శాతం), కేరళకు చెందిన తొమ్మిది మందిలో ఆరుగురు (67 శాతం), పశ్చిమబెంగాల్‌కు చెందిన 16 మందిలో ఐదుగురు (31శాతం) తమ అఫిడవిట్‌లలో తమపై క్రిమినల్‌ కేసులు ఉన్నట్టు ప్రకటించారు.
