న్యూ ఇయర్‌… అంటే క్యాలెండర్‌ మారడమే కాదు.. మనలో కూడా ఏదో మార్పు రావాలని కోరుకునే వాళ్లు చాలామంది ఉంటారు. దానిలో భాగంగానే న్యూ ఇయర్‌ రిజొల్యూషన్స్‌ తీసుకుంటారు. కొందరు వాటిని కచ్చితంగా ఫాలో అవుతారు. మరికొందరు పాటించడానికి ట్రై చేస్తారు. మరికొందరు పూర్తిగా విస్మరిస్తారు. అయితే 2024 అలా కాకూడదు.. కచ్చితంగా ఈ ఏడాది మంచి రెజొల్యూష్యన్‌ తీసుకోవాలి. ఇవి మీకు మానసికంగా, శారీరకంగా, ఆర్థికంగా కూడా మంచి చేస్తాయి. అందుకే ఈరోజు నుండే వీటిని ఫాలో అవుదాం… మరి అవేంటో తెలుసుకుందాం.
చాలామంది పనులు వాయిదా వేస్తారు. దానికి వివిధ కారణాలు చెప్తారు. అలా ఆపేసిన పనులన్నీ కలిసి మీపై ఒత్తిడిని పెంచుతాయి. కాబట్టి సమయాన్ని వృథా చేసే అంశాలకు దూరంగా ఉంటూ నిర్వహించాల్సిన పనిపై దృష్టి పెట్టండి. మొత్తంగా కాకపోయినా కొంచెం కొంచెంగా అయినా గడువులోపు దానిని పూర్తి చేయండి. అది కేవలం ఆఫీస్‌ విషయాలే కానవసరం లేదు. ఉదాహరణకు మీరు ఓ బుక్‌ చదవాలనుకుంటే.. కనీసం రోజుకో పేజీ అయినా చదివేలా ప్లాన్‌ చేసుకోవాలి. ఒకరోజు ఎక్కువ చదివేశామని రెండో రోజు వద్దులే.. అన్నీ ఒకేసారి చదివేద్దాం అనుకోకూడదు. కొంచెం చదివినా రోజూ దానిని కంటిన్యూ చేయడం ముఖ్యం. ఇది మీపై ఒత్తిడిని తగ్గిస్తుంది. చాలా విషయాల్లో మీరు చురుగ్గా ఉండేలా చేస్తుంది.
కొంచెం గ్యాప్‌ తీసుకోండి..
‘ఈరోజు ఊపిరాడని పని ఉంది, చాలా కష్టపడి పోయాను’ అని అందరూ చాలా సందర్భాల్లో అంటూనే ఉంటారు. అంత అవసరం లేదు. అలాగని కష్టపడటాన్ని ఆపమనటం లేదు. ఎంత బిజీగా ఉన్నా.. రెండు మూడు గంటలకు ఓ సారి చిన్న బ్రేక్‌ తీసుకోండి. ఓ పది నిమిషాలు ఫోన్‌ కూడా చూడకుండా నచ్చినవారు దగ్గర ఉంటే వారితో మాట్లాడండి. లేదంటే ఎక్కడైనా కూర్చోని బ్రీత్‌ ఎక్సర్‌ సైజ్‌లు చేయండి. ఇది మిమ్మల్ని ఒత్తిడి నుంచి రిలాక్స్‌ ఇస్తుంది. బ్రేక్‌ తీసుకోవడం కుదరదు అంటే.. రోజులో ఓ అరగంట మీకు మీరు కేటాయించుకోండి. పార్క్‌లోకి వెళ్లండి. లేదంటే ఒంటరిగా కూర్చోండి. నచ్చిన విషయాలు గురించి ఆలోచించండి. పని గురించి కాకుండా ఇంక దేని గురించైనా మీకు పాజిటివ్‌ ఇచ్చే విషయాలు గురించి థింక్‌ చేయండి. ఇవి మీరు రీఛార్జ్‌ అవ్వడానికి హెల్ప్‌ చేస్తాయి.
తీసుకునే ఆహారం
మనం కష్టపడేది కడుపు నిండా తినడం కోసమే. అయితే కొందరు ఏమి తింటున్నారో? ఎందుకు తింటున్నారో తెలియకుండా తినేస్తారు. అది హెల్త్‌కి మంచిదా చెడ్డదా అని ఆలోచించరు. అనవసరమైనవి ఎక్కువగా తింటే ఆరోగ్యం పాడైపోతుంది. కాబట్టి తీసుకునే ఆహారం విషయంలో శ్రద్ధ వహించండి. శరీరం డస్ట్‌ బిన్‌ కాదు. ఏది పడితే అది లోపల వేసేయడానికి. ఫుడ్‌ అంటే ఆసక్తి ఉంటే కొత్త వాటిని ట్రై చేయడంలో తప్పులేదు కానీ.. అదే పనిగా అనారోగ్యకరమైన ఫుడ్స్‌ తీసుకోవడం అస్సలు మంచిది కాదు.
ఆరోగ్యంపై దృష్టి..
డబ్బు కన్నా ఆరోగ్యం చాలా విలువైనది. డబ్బులు ఎన్ని ఉన్నా ఆరోగ్యం సరిగ్గా లేకుంటే ఎంత సంపాదించినా వేస్ట్‌. కాబట్టి ఆరోగ్యంపై శ్రద్ధ తీసుకోవడం ప్రారంభించండి. ఏమి తింటున్నారు? ఎంత వర్క్‌ చేస్తున్నారు? ఎంత సేపు నిద్రపోతున్నారు? రోజులో మీ ఆరోగ్యం కోసం మీరు ఏమి చేస్తున్నారు వంటి విషయాలపై కచ్చితంగా శ్రద్ధ తీసుకోండి. మీరు ఎంత ఆరోగ్యంగా ఉంటే.. మీ భవిష్యత్‌ అంత బాగుంటుంది.
ఒత్తిడి తగ్గించుకోండి..
మానసికంగా, శారీరకంగా కృంగదీయడంలో ఒత్తిడి ముందు ఉంటుంది. దీనిని తట్టుకుని ముందుకు వెళ్లడం చాలా కష్టం. అనవసరమైన విషయాలకు ఎక్కువ ఆలోచించి స్ట్రెస్‌ తీసుకోకండి. కొన్ని విషయాలు మనం ఎంత చేసినా అవి మన కంట్రోల్‌లో ఉండవు. అలాంటి వాటి గురించి ఎక్కువ ఆలోచించకుండా ఉన్న సమయాన్ని హాయిగా, ప్రశాంతంగా గడిపేయండి.
ఇలాంటి చిన్న చిన్న విషయాలే మీ జీవితంలో ఎన్నో మార్పులు తీసుకొస్తాయి. ఇవి మానసికంగా, శారీరకంగా కూడా మిమ్మల్ని అభివృద్ధి చేస్తాయి. పెద్ద పెద్ద మార్పులే చేయాల్సిన అవసరం లేదు.. చిన్న చిన్న విషయాలు కూడా మీ జీవితంలో పెద్ద మార్పులు తీసుకువస్తాయి. కాబట్టి హ్యాపీగా వీటిని ఫాలో అయిపోతే కొత్త ఏడాదిలో మీరు కొత్తగా ఏదైనా చేసేందుకు వీలుంటుంది.
రిలేషన్స్‌..
ఏ రిలేషన్‌కి అయినా బౌండరీలు పెట్టుకోండి. ఇది మిమ్మల్ని మానసికంగా ఇబ్బంది పడకుండా చేస్తుంది. ఓ వ్యక్తి మీ లైఫ్‌లోకి రావాలన్నా.. మీరు ఇతరుల లైఫ్‌లోకి వెళ్లాలన్నా ఈ బౌండరీలు కచ్చితంగా ఉండాలి. ఇది వ్యక్తిగత జీవితాలకు, పర్సనల్‌ స్పేస్‌కు చాలా అవసరం. రిలేషన్‌లో ఉన్నాక పర్సనల్‌ స్పేస్‌ ఏంటి అనుకోవచ్చు. కానీ ఇది ఏ రిలేషన్‌కి అయినా అవసరం. లేదంటే ఇతరవ్యక్తులు మీకు ఇబ్బందిగా కనిపించే ప్రమాదముంది. కాబట్టి రిలేషన్‌లో కాస్త సెన్సబుల్‌గా ఉంటూనే బౌండరీలు పెట్టుకోవడం మంచిది.
తేలికపాటి వ్యాయామాలు
జిమ్‌కి డబ్బులు కట్టేసి తర్వాత మానేయడం కాదు. చాలామంది న్యూ ఇయర్‌కి చేసే మొదటి పని ఇది. కానీ మీరు నిజంగా హెల్తీగా ఉండాలంటే జిమ్‌కే వెళ్లాల్సిన అవసరం లేదు. ఇంట్లో ఉంటూనే ఆరోగ్యాన్ని కాపాడుకోవచ్చు. బరువు తగ్గొచ్చు. హెల్తీగా, ఫిట్‌గా ఉండొచ్చు. రోజులో ఎంతో కొంత సమయం తేలికపాటి వ్యాయామాలు చేయండి. నిద్ర లేచిన వెంటనే బాడీ స్ట్రెచ్‌ చేయండి. ఎండలో కాసేపు నిలబడండి. కుదిరితే వాకింగ్‌ చేయండి. కానీ ఏది చేసినా.. రోజూ దానిని కంటిన్యూ చేయండి. కచ్చితంగా మీలో ఎంత మార్పు వస్తుందో మీకే తెలుస్తుంది.
ఆదా చేయడం
ఇది ప్రతి ఏడాది అందరికీ ఉండే రిజల్యూషన్‌లో ఒకటి. జీవితాన్ని ప్రేమ, అనురాగం, ఆప్యాతలే ముందుకు నడిపిస్తాయి అంటారు. అయితే వీటన్నింటిని రూల్‌ చేసేదే డబ్బు. ఇది ఉంటేనే అన్ని మనకు వస్తాయి. డబ్బుతో పనేమి ఉందని కొందరు అంటారు కానీ.. ఇదే అన్నింటిని నడిపిస్తుంది. కాబట్టి మీ దగ్గరున్న డబ్బులో మీ ఖర్చులకు పోగా ఓ పదిశాతం డబ్బునైనా పక్కకు పెట్టడం నేర్చుకోండి. దానిని ఎట్టి పరిస్థితుల్లో బయటకు తీయకండి. ఇలా కొన్నాళ్లు జమ చేసిన సొమ్మును మంచి వాటిలో ఇన్వెస్ట్‌ చేయండి. ఫుడ్‌ బయట ఆర్డర్‌ చేయడం తగ్గించండి. అనవసరంగా బట్టలు కొనడం ఆపండి. అలా అని మరీ పిసినారిగా ఉండమని కాదు.. కాస్త పొదుపుగా ఉండడం నేర్చుకోండి. అనవసరమైన చోటు ఖర్చు చేయకండి. అవసరమైన చోట ఖర్చు పెట్టే ముందు ఓసారి ఆలోచించండి.
