నగరంలో మరికొన్ని ప్రాంతాల్లో తీరనున్న ట్రాఫిక్ కష్టాలు
ఆర్టీసీ క్రాస్రోడ్డులో ట్రాఫిక్ సులభతరం
ఇందిరాపార్కు, విద్యానగర్ ప్రాంతాల్లో ట్రాఫిక్ కష్టాలు త్వరలోనే తీరనున్నాయి. నిత్యం రద్దీగా ఉండే ఈ రోడ్డు ప్రస్తుతం వాహనాలతో కిక్కిరిసిపోతుంది. ఐదు కిలోమీటర్ల దూరానికి గంటల తరబడి ప్రయాణించాల్సి వచ్చేది. ఉదయం 9 నుంచి 10:30గంటల వరకు, సాయంత్రం 3:30గంటల నుంచి రాత్రి 9 వరకు ట్రాఫిక్ ఇబ్బందులు చెప్పనక్కర్లేదు. ఇందిరాపార్కు నుంచి వీఎస్టీ వరకు దాదాపు రూ.350 కోట్లతో నిర్మిస్తున్న స్టీల్ బ్రిడ్జి అందుబాటులోకి వస్తే ట్రాఫిక్ సమస్య నుంచి ఉపశమనం లభిస్తుంది. ముఖ్యంగా ఆర్టీసీ క్రాస్రోడ్, అశోక్నగర్లో ట్రాఫిక్ సులభతరం అవుతుంది.
ఇందిరాపార్కు టూ వీఎస్టీ వరకు నాలుగు లైన్ల స్టీల్ బ్రిడ్జి
నవతెలంగాణ-సిటీబ్యూరో
హైదారబాద్ నగరవాసులకు త్వరలో స్టీల్ బ్రిడ్జి అందుబాటులోకి రానుంది. నగరంలో పెరుగుతున్న ట్రాఫిక్ సమస్య లను అధిగమించేందుకు ఎస్ఆర్డీపీ చేపట్టిన పనులు ఒక్కొక్కటి అందు బాటులోకి వస్తున్నాయి. ఈ క్రమంలో ఇందిరాపార్కు టూ వీఎస్టీ వరకు నిర్మిస్తున్న స్టీల్ బ్రిడ్జి త్వరలోనే అందుబాటులోకి రానుంది. ఈ బ్రిడ్జి వినియోగంలోకి వస్తే ఇందిరాపార్కు నుంచి విద్యానగర్నగర్ వరకు ట్రాఫిక్ కష్టాలు తీరడంతోపాటు వీఎస్టీ నుంచి లక్డీకాపూల్ వైపు ప్రయాణికులకు ఇప్పుడున్న అడ్డంకులు తగ్గే అవకాశాలున్నాయి.
2.8 కిలోమీటర్లు, రూ.3.50 కోట్లు
నగరంలో సిగల్ రహిత ప్రయాణాన్ని అందుబాటులోకి తెచ్చేందుకు సర్కారు అమలు చేస్తున్న ఎస్ఆర్డీపీ కార్యక్రమం సుమారు రూ.350 కోట్లతో ఇందిరాపార్కు నుంచి ఆర్టీసీ క్రాస్ రోడ్డులోని వీఎస్టీ వరకు (ఆజామాబాద్ మీదుగా) చేపట్టిన స్టీల్ బ్రిడ్జి ఏర్పాటు పనులు తుది దశకు చేరుకున్నాయి. 2.8 కిలోమీటర్లు, నాలుగు లైన్లుగా స్టీల్తో నిర్మించిన ఈ బ్రిడ్జి పనులు ఈ నెలాఖరు వరకు పూర్తి కానున్నట్టు సమాచారం.
బ్రిడ్జి పనులు పూర్తి కాగా, బ్రిడ్జిపై బీటీ రోడ్డు వేసే పనులను జీహెచ్ఎంసీ అధికారులు చేస్తున్నారు. ఈ నెలాఖరులోగానీ, వచ్చే నెల మొదటి వారంలోగానీ బ్రిడ్జిని ప్రారంభించేందుకు మున్సిపల్ శాఖ మంత్రి కేటీఆర్ అపాయింట్మెంట్ తీసుకోవాలని జీహెచ్ఎంసీ అధికారులు భావిస్తున్నారు. 81 స్టీల్ పిల్లర్లతో ఎంవీఆర్ ఇన్ఫ్రాస్ట్రక్చర్ సంస్థ ఈ స్టీల్ బ్రిడ్జి పనులు చేపట్టింది. ఈ బ్రిడ్జి అందుబాటులోకి వస్తే ఇందిరాపార్కు జంక్షన్తోపాటు అశోక్నగర్ చౌరస్తా, ఆర్టీసీ క్రాస్ రోడ్, వీఎస్టీ మెయిన్ రోడ్డులో కూడా ట్రాఫిక్ తగ్గుతుంది.