నవతెలంగాణ- చండీగఢ్‌: అల్లరి మూక దాడి నుంచి ఒక మహిళా జడ్జీ తృటిలో తప్పించుకున్నారు. మూడేళ్ల కుమార్తెతో కలిసి కారు దిగి ప్రాణ భయంతో పరుగులు తీశారు. ఒక వర్క్‌ షాప్‌లో దాక్కున్నారు. ఆ తర్వాత కొందరు న్యాయవాదులు ఆమెను అక్కడి నుంచి రక్షించారు. అయితే రోడ్డుపై వదిలేసిన మహిళా న్యాయమూర్తి కారుకు ఆందోళనకారులు నిప్పుపెట్టడంతో అది పూర్తిగా కాలిపోయింది. హర్యానాలోని నూహ్‌లో ఈ సంఘటన జరిగింది. నూహ్‌ కోర్టులో అడిషనల్ చీఫ్ జ్యుడీషియల్ మేజిస్ట్రేట్ (ఏసీజేఎం)గా ఉన్న అంజలి జైన్ సోమవారం మధ్యాహ్నం 1 గంటకు మాడేళ్ల కుమార్తె, గన్‌మ్యాన్‌తో కలిసి కారులో ఎస్‌కేఎం మెడికల్‌ కాలేజీకి వెళ్లారు. అక్కడ మందులు కొనుగోలు చేసిన తర్వాత మధ్యాహ్నం 2 గంటలకు కారులో తిరిగి వెళ్తున్నారు. పాత బస్టాండ్‌ వద్ద సుమారు 150 మంది ఉన్న అల్లరి మూకలు మహిళా జడ్జీ ప్రయాణిస్తున్న కారుపై దాడి చేశారు. రాళ్లు రువ్వగా కారు వెనుక ఉన్న అద్దాలు పగిలాయి. ఆ ప్రాంతంలో కొందరు కాల్పులు కూడా జరిపారు. ఈ క్రమంలో న్యాయమూర్తి అంజలి జైన్, మూడేళ్ల కుమార్తెను తీసుకుని డ్రైవర్‌, గన్‌మ్యాన్‌ సహాయంతో కారు దిగారు. ప్రాణాలు దక్కించుకునేందుకు రోడ్డుపై పరుగులు తీశారు. పాత బస్టాండ్‌ వద్ద ఉన్న వర్క్‌షాప్‌లో వారంతా దాక్కున్నారు. ఆ తర్వాత కొంత మంది న్యాయవాదులు అక్కడకు చేరుకుని ఆ మహిళా జడ్జీ, ఆమె కుమార్తెను రక్షించారు.
