చిరంజీవి నటించనున్న ఫాంటసీ అడ్వెంచర్‌ చిత్రం త్వరలో సెట్స్‌ పైకి వెళ్లేందుకు సిద్ధంగా ఉంది. యువి క్రియేషన్స్‌ నిర్మాణంతో ‘బింబిసార’ ఫేమ్‌ వశిష్ట దర్శకత్వంలో తెరకెక్కనున్న ఈ సినిమా యూనిట్‌, కొంతమంది అతిథులు సమక్షంలో పూజా కార్యక్రమాలతో గ్రాండ్‌గా ప్రారంభమైంది. చిరంజీవి, సురేఖ దంపతులు కలిసి ప్రొసీడింగ్స్‌ను ప్రారంభించడానికి మేకర్స్‌కి స్క్రిప్ట్‌ను అందజేయగా, అల్లు అరవింద్‌ కెమెరా స్విచ్‌ ఆన్‌ చేశారు. కె రాఘవేంద్రరావు క్లాప్‌ ఇచ్చారు. ఈ కార్యక్రమంలో వివి వినాయక్‌, మారుతి తదితరులు పాల్గొన్నారు. పాత సంప్రదాయాన్ని తిరిగి తీసుకువస్తూ లాంచ్‌కు ముందు మేకర్స్‌ సినిమా మ్యూజిక్‌ రికార్డింగ్‌ను ప్రారంభించారు. ఈ సందర్భంగా సంగీత దర్శకుడు ఎంఎం కీరవాణి మాట్లాడుతూ, ‘మెగాస్టార్‌ చిరంజీవి అభిమానులకు శుభవార్త. ఇది చిరంజీవి 156వ చిత్రం. యూవీ క్రియేషన్స్‌ 14వ ప్రొడక్షన్‌. సినిమాలో 6 పాటలు ఉంటాయి. సంగీత రికార్డింగ్‌తో పూజా కార్యక్రమాలను ప్రారంభించడం సంప్రదాయం. ఆ సంప్రదాయాన్ని తిరిగి తీసుకువస్తూ, మ్యూజిక్‌ రికార్డింగ్‌తో ప్రొసీడింగ్‌లను ప్రారంభించాలనుకుంటున్నాం. సెలబ్రేషన్స్‌ సాంగ్‌ రికార్డింగ్‌తో పనులు ఆరంభమయ్యాయి. సినిమాను తన భుజస్కంధాలపై మోస్తున్న వశిష్టకు ఆల్‌ ది బెస్ట్‌’ అని తెలిపారు. ‘ఇలాంటి అరుదైన, అసాధారణమైన సినిమాలో భాగమైనందుకు సంతోషంగా ఉంది. కీరవాణికి, దర్శకుడు వశిష్టకు, నిర్మాతలకు హదయపూర్వక ధన్యవాదాలు. అద్భుతమైన పాటలతో మీ ముందుకు వస్తామని హామీ ఇస్తున్నాం’ అని గీత రచయిత చంద్రబోస్‌ చెప్పారు. విక్రమ్‌, వంశీ, ప్రమోద్‌ నిర్మిస్తున్న ఈ చిత్రం ఇప్పటి వరకు చిరంజీవి కెరీర్‌లోనే హై బడ్జెట్‌ మూవీ అని చిత్ర యూనిట్‌ తెలిపింది.
