ఆయుధం -

నిద్ర రాని మనువడు
తాతతో అన్నడు
కథ చెప్పు అని

తాత చెప్పిండూ …
ఒకానొక శుభ ముహూర్తాన
ఉపవాసం ఉన్న పులి జనంలోకి వచ్చింది

మాంసాహారమా? అంటే ఏమిటి?
నల్లనివన్నీ నీళ్ళు
ఎర్రనివన్నీ పండ్ల రసాలంటూ
నమ్మబలుకుతున్నది
కోరలు పీకిన పాములా
గడప గడపకు పాకుతున్నది

ఊళ్ళోకి కొన్ని ఇనుప డబ్బాలొచ్చాయి
మబ్బులు పట్టిన సూర్యుడిలా
అప్పుడెప్పుడో
జమ్మిచెట్టు మీద దాచిన విల్లంబుల్లా ఉన్నయి

ఊరు
తడితడిగా ఉన్న
మునుపటి గాయం తాలూకు గుర్తులు
ముట్టుకుని చూసింది
వసరు కారుతున్నది

ఆకలికి నకనకలాడుతూ
పులి
బక్క చిక్కి పోతున్న భయమవుతున్నది
పంజా పదును సరిచూసుకున్నది

పులి
ఒక్క అడుగు వెనుకకు జరిగింది
ఊరు హుషారయ్యింది
మీదికి దునికే
రక్తం రుచి మరిగిన ప్రమాదం పసిగట్టింది

గుండెల్లో దాచుకున్న ఆయుధం
అందుకున్నది
ఒక్కటే దెబ్బ
అంతే…
పులి మళ్ళీ లేవలేదు.
– గజ్జెల రామకృష్ణ, 8977412795

Spread the love